Նիկոլ Փաշինյանը կզոհաբերի ի՞ր, թե Թանդիլյանի սկզբունքայնությունը

Նիկոլ Փաշինյանի կառավարությունում տարօրինակ բաներ են կատարվում։ Մի քանի օր առաջ հրաժարականի դիմում ներկայացրած Սոցապնախարար Մանե Թանդիլյանը չգիտես ինչու ներկայացել էր կառավարության հերթական նիստին։ Նիկոլ Փաշինյանը դեռեւս չի ստորագրել Թանդիլյանի հրաժարականի դիմումը, սակայն միթե դրանից բան է փոխվում, կամ դա կարող է պատճառ դառնալ, որպեսզի տիկին Թանդիլյանը, ով ընդամենը օրեր առաջ հրաժարականի պատճառները ներկայացնելիս ասաց, թե իր պատկերացումները չեն համապատասխանում այս կառավարության տեսլականին, որի պատճառով էլ հրաժարական է ներկայացնում։ Դրանից հետո Լուսավոր Հայաստան կուսակցության ղեկավար Էդմոն Մարուքյանը պարզաբանեց, որ իրենց սկզբունքներն էլ չեն փոխվել պարտադիր կուտակայինի վերաբերյալ, եւ իրենք հակված են հետաձգել այդ համակարգը, մինչեւ Սահմանադրական դատարանը կքննարկի համակարգի սահմանադրականությունը: Շատերի, այդ թվում՝ Մանե Թանդիլյանի կարծիքով, պարտադիր կուտակային համակարգը հակասահմանադրական է։ Ընդգծենք, որ Թանդիլյանը արմատական մոտեցումներ ունի կուտակայինի հարցում, նա Դեմ եմ շարժման ակտիվիստներից էր եւ քաղաքականություն մուտք գործեց դրանից հետո։ Այսինքն, պարզից էլ պարզ է, որ Մանե Թանդիլյանի որեւէ զիջում պարտադիրի հրաժարումից, ընկալվելու էր որպես նրա անսկզբունքայնություն։ Տեղեկություններ կան, որ պաշտոնը ստանձնելու պահին Փաշինյանի եւ Թանդիլյանի միջեւ թեմայի վերաբերյալ զրույց է եղել, քանի որ հուլիսի մեկից պետք է ներդրվեր պարտադիր համակարգը, Թանդիլյանը սա խոչընդոտ է համարել իր նշանակման հարցում։ Սակայն Նիկոլ Փաշինյանը հիշեցրել է, որ ԵԼՔ դաշինքի իրենց նախնտրական ծրագրում եւս կետ կա պարտադիրից հրաժարվելու վերաբերյալ։ Ստանձնելով պաշտոնը Թանդիլյանը իր պատկերացրած նախագիծն է ներկայացրել՝ զերծ պարտադիր բաղադրիչից, բայց վերջին պահին Փաշինյանը նրան հորդորել է հանել նախագիծը, քանի որ շրջանառության մեջ է դրվելու այն, որը նախկին իշխանություններն էին նախաձեռնել, ինչը նշանակում է՝ պարտադիր համակարգի կիրառում։ Այն, ինչ եղավ դրանից հետո, տեղյակ են բոլորը։ Թե ինչու Փաշինյանը կտրուկ մտքափոխվեց, կառավարության մեր աղբյուրները պնդում են, որ խնդիրը կապված է միջազգային ֆոնդերի հետ։ Փաշինյանը ակնկալում է, որ այսպիսով կարող է միջազգային խոշոր ֆոնդերի սեփականատերերին գրավել եւ ներդրումներ բերել Հայաստան,ինչը անհեռանկար մտայնություն է։ Վերադառնալով Թանդիլյանի ներկայությանը կառավարության նիստին, այս իրավիճակում կամ Նիկոլ Փաշինյանը պետք է հրաժարվի շրջանառության մեջ դրված նախագծից, ինչը աներեւակայելի է, կամ պետք է համոզի Թանդիլյանին հետ վերցնել հրաժարականի դիմումը՝ հիմնավորմամբ, որ սպասի մինչեւ ՍԴ-ում հարցի քննությանը։ Սակայն այս դեպքում կստացվի, որ Փաշինյանի կառավարությունում տունտունիկ են խաղում, ով երբ, ինչ ուզում անում է։ Քանզի Փաշինյանի կառավարությունում գործընկերների միջեւ արդեն տարաձայնություններ են սկսվել, ԲՀԿ-ականները ցայտնոտի մեջ են հայտնվել Բարեգործության մասին օրենքից, որ վարչապետը շրջանառության մեջ է դրել՝ ընդդեմ Ծառուկյանի, ՀՅԴ-ականները եւս լավ օրի չեն, Արծվիկ Մինասյանի հետ վարչապետի անհարգալից վերաբերմունքը նրանք ծանր են տարել։ Այս պայմաններում Փաշինյանին ավելորդ լարվածություն պետք չէ, առավել եւս Ելք-ի իր գործընկերների կողմից, եւ ուրեմն կարելի է զոհաբերել Մանե Թանդիլյանի սկզբունքայնությունն ու արժանապատվությունը։ Անի Սահակյան