Շարմազանով. Գրիգորյանը չի ընդունում մեղադրանքը

Ազգային ժողովի փոխնախագահ, Հայաստանի հանրապետական կուսակցության (ՀՀԿ) խոսնակ Էդուարդ Շարմազանովը «Ազատությանը» հայտնեց, որ պատգամավոր, գեներալ Մանվել Գրիգորյանը չի ընդունում մեղադրանքը։ Գրիգորյանը շաբաթ օրն է ձերբակալվել, ինչպես Ազգային անվտանգության ծառայությունն է հաղորդում, Քրեական օրենսգրքի 235-րդ հոդվածի 2-րդ մասի հատկանիշներով («Մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը») նախատեսված հանցագործություն կատարելու կասկածանքով: «Մանվել Գրիգորյանը չի ընդունում շինծու մեղադրանքը», - ասաց Շարմազանովը, ով Հանրապետական խորհրդարանական խմբակցության ղեկավար Վահրամ Բաղդասարյանի և խմբակցության պատգամավոր Սեդրակ Սարոյանի հետ ուշ երեկոյան հանդիպել էր Գրիգորյանին։ «Սա անթույլատրելի, հակաօրինական և հակասահմանադրական է։ Պատգամավորին կարող են ձերբակալել հանցագործության պահին կամ դրանից հետո։ Դրանցից ոչ մեկն առկա չէ», - ասաց ՀՀԿ խոսնակը։