Մոսկվան ի՞նչ կպահանջի զիջել Փաշինյանին՝ գազի դիմաց

Երկօրյա աշխատանքային այցով Ռուսաստանի Դաշնությունում գտնվող Նիկոլ Փաշինյանը, ռուսաստանյան քարոզչամեքենայի հիմանական միջոց՝ RT-ին ծավալուն հարցազրույցում է տվել, որում անդրադարձել է նաև հայ-ռուսական փոխհարաբերությունների ներկա փուլին: Այս մասին հարցին պատասխանելիս, Փաշինյանն ասել է. «Ռուսական մամուլում բազմաթիվ հրապարակումներ կան, որոնց հեղինակները լավ չեն պատկերացնում, թե ինչ է տեղի ունեցել Հայաստանում: Նրանք կարծում են, իշխանության է եկել հակառուսական մեկը, բայց հայկական իրադարձությունների հետևում ոչ մի քաղաքական ուժ, ոչ մի երկիր կանգնած չի եղել: Նրանք, ովքեր կարծում էին, թե իշխանության փոփոխությամբ Հայաստանի ու Ռուսաստանի հարաբերություններում ինչ-որ բան է փոխվելու, սխալվում էին: Նրանք շարունակելու են սխալվել նաև հիմա, եթե դեռ այդպես են կարծում»: Խոսելով իր ու Վլադիմիր Պուտինի հարաբերությունների մասին, վարչապետն ասել է. «Մենք շատ լավ, ուղիղ հարաբերություն ունենք։ Այդպես առաջին րոպեներից է եղել։ Կարող եմ ասել, որ մեր հարաբերություններում «մութ անկյուններ» չկան։ Մենք ամեն ինչ ուղիղ ենք քննարկում։ Բոլոր հարցադրումներն ուղիղ են։ Ու մենք դրանց ուղիղ ենք պատասխանում։ Վլադիմիր Վլադիմիրովիչն այդպիսի մարդ է։ Ինչպես հասկանում եմ, նրա համար շփման այդպիսի ոճը շատ հարմար է, ինձ համար էլ է այդպես հարմար»: Ն. Փաշինյանը նաև նշել է, որ Ռուսաստանն ու Հայաստանը ինքնիշխան երկրներ են ու 2 երկրների շահերը մեծ մասամբ համընկնում են ու հայ-ռուսական հարաբերություններում խնդրահարույց կետեր չկան: Փաշինյանը պատասխանել է նաև գազի սակագնի մտահոգիչ հարցին: Լրագրողը գազի սակագնի հարցը անվանել է խնդրահարույց, այնուհետ խնդրել պարզաբանել այդ մասին վարչապետի դիրքորոշումը: Փաշինյանը պատասխանել է, որ քննարկումների արդյունքում եկել են այն եզրահանգման, որ դա ներհայաստանյան խնդիր է, քանի որ սահմանին Հայաստանը գազը ստանում է ցածր սակագնով, սակայն մինչ սպառողներին հասնելը, երկրի ներսում այն թանկանում է գրեթե կրկնակի անգամ: Այս խնդիրը մենք պետք է վերլուծենք ու պարզաբանենք մեր երկրի ներսում, հարցը կապ չունի հայ-ռուսական հարաբերությունների հետ: Հստակեցնելով ռուսաստանյան սակագների շուրջ դժգոհությունների առկայության հանգամանքը, Փաշինյանը նշել է, որ Հայաստանը, իհարկե, ցանկանում է գազ ստանալ ավելի ցածր սակագնով. «Մենք հասկանում ենք, որ Հայաստանի համար սահմանված սակագինը բացառիկ էժան է, բայց մենք առավել բացառիկ սակագին ենք ուզում: Այս հարցը կքննարկենք, ու կարծում եմ, հաջողություն կգրանցենք»,-ասել է Նիկոլ Փաշինյանը: Առհասարակ, ժամանակն է, որպեսզի Փաշինյանի կառավարությունը սկսի կամաց-կամաց դուրս գալ պոպուլիստական կոչերի դաշտից, վաղ թե ուշ, ավելի ճիշտ կառավարության գործունեության՝ «100 օրվա» սկզբունքի համաձայն հասարակությունը կարող է և պարտավոր է վերլուծել արդյունքները: Դրանք չեն լինի 100 օրում, իհարկե, բոլորն են հասկանում, չեն կարող լինել ահռելի փոփոխություններ, բայց սկսածը գնահատելու առումով ևս՝ այդ 3 ամիսն էլ քիչ չեն: Առհասարակ էներգետիկ համակարգը, որը ռուսական մենաշնորհ է՝ ավելի մեծ խնդիր ունի: Սխալված չենք լինի, եթե արձանագրենք, որ կոռուպցիայի մեջ թաթախված լինելու ամենացայտուն օրինակը հենց այս համակարգն է: Սկսել է պետք այդտեղից ու պարզել քանի միլիարդներ են հափշտակվել այս տարիների ընթացքում: Իհարկե, ռուսական կողմը, եթե լրացուցիչ գնի իջեցման շուրջ սկսի բանակցել, ապա, վստահաբար, դրա դիմաց ինչ-որ բան կպահանջի: Ուրեմն պետք է նաև աչքի առաջ ունենալ նման ելքը՝ իսկ Մոսկվան ի՞նչ կպահանջի զիջել Փաշինյանին:   Թամար Բագրատունի