Նիկոլը մեզ կանգնեցրել է տհաճ ընտրության առջեւ
Շաբաթներ շարունակ Էջմիածնում ընթացող ներքին խժդժությունները, իշխանափոխության ստվերային գործընթացը, որը նախաձեռնել է քրեական հեղիանակություն Դոն Պիպոն, դարձավ հրապարակային: Էջմիածնում բազմամարդ հանրահավաք տեղի ունեցավ Էջմիածնի քաղաքապետ Կարեն Գրիգորյանի` գեներալ Մանվել Գրիգորյանի որդու հրաժարականի պահանջով: Հիշեցնենք, որ Գրիգորյանների եւ Դոն Պիպոյի հարատեւ թշնամության մասին մամուլը գրում է տարիներ շարունակ, Էջմիածնի բնակիչ Արթուր Ասատրյանը՝ նույն ինքը Դոն Պիպոն, տարիներ առաջ գեներալի արտաքսմամբ է հեռացել հարազատ քաղաքից ու հայրենիքից, ապաստանել Իտալիայում ու դարձել Դոն: Երեկ նա անձամբ էր մասնակցում հանրահավաքին ու թեպետ վստահեցնում էր, որ շարքային էջմիածնեցու կարգավիճակով է մասնակցում եւ ինքը կապ չունի հանրահավաքի հետ, սակայն հրավիրյալ երգիչ-երգչուհիները, որոնք հանդես եկան համերգով, շնորհակալական խոսք էին հայտնում հենց Դոն Պիպոյից: Այսինքն մի քրեական տարր որոշել է ազատվել մեկ ուրիշ քրեական տարրից, որն այսօր քաղաք է ղեկավարում ու քաղաքային կառավարումից դժգոհ էջմիածինցիների մի հատվածն էլ ակամայից մասնակից է դարձել այս վտանգավոր իրողությանը: Ընդ որում` ամենասարսափելին այն է, որ Դոն Պիպոյի բանդան գործում է թավշյա հեղափոխության անունից` նրա կարգախոսներով, խորհրդանիշներով, Նիկոլ Փաշինյանի լուսանկարներով: Մի՞թե թավշյա հեղափոխությունը պետք է նույնանա դոնպիպոների հետ, որոնք ողջ կյանքը թաթախված են արյունոտ պատմությունների ու հանցագործությունների մեջ: Միթե պետությունն ի զորու չէ լուծելու այս խնդիրն օրինականության դաշտում, եթե կա Էջմիածնում իշխանափոխության խնդիր, ապա քաղաքապետին եւ այն էլ գեներալի որդուն պաշտոնանկ անելը մեկից մեկ է, չենք խոսում իրավական պատասխանատվության մասին: Միայն մամուլի հրապարակումները բավարար են, որ քաղաքապետի դեմ հատորներով գործեր կազմվեն: Եւ քանի որ հեղափոխության ուժը դեռ գործում է, ինչը վարչապետ Փաշինյանն ապացուցել է մի քանի անհավանական դրվագներում, ապա Նիկոլ Փաշինյանը ժամ առաջ պետք է կանխի քրեական տարրերի ինքնադատաստանը Էջմիածնում: Ի վերջո, մենք տեսանք, որ Փաշինյանի կոչով դադարեցին անգամ Արցախում ընթացող բողոքի ակցիաները, անգամ Սասնա ծռերի համակիրները բացեցին փողոցները, որոնք փակել էին տղաներին ազատ արձակելու պահանջով, ընդհանրապես Հայաստանում դադարեցվեցին փողոցներ փակելը: Հիմա ոչ մի բան չի խանգարում եւ ավելին անհրաժեշտ է, որ Փաշինյանը սաստի նաեւ այս գործընթացը: Պատկան մարմինների առաջնահերթ գործառույթը պետք է լինի Էջմիածնում ծավալվող քրեական հեղաշրջումը կանխելը: Այլապես կստացվի, որ հենց նա է կանգնեցրել սարսափելի ընտրության առջեւ: Անի Սահակյան
Հետևեք մեզ Viber-ում
