Հեղափոխական պաթոսն ընդդեմ ռուսական ցինիզմի

Ադրբեջանի մամուլի խորհուրդը ու ևս 25 լրատվամիջոցներ բողոքի նամակ են հղել Ռուսաստանի արտգործնախարարության տեղեկատվության վարչության պետ Մարիա Զախարովային, պնդելով, որ հունիսի 1-ին կայացած վարչության պետի տեղակալի ճեպազրույցի պաշտոնական հաղորդագրությունում վերջինիս պատասխանը խեղաթյուրված է: Նամակում շարադրված է նախապատմությունը: Հունիսի 1-ին Ռուսաստանի ԱԳՆ տեղեկատվության վարչության պետի տեղակալ Արտյոմ Կոժինի ճեպազրույցում ադրբեջանական «Թրենդ» գործակալության թղթակիցը հարց էր տվել՝ ճշտելու Ռուսաստանի դիրքորոշումը ղարաբաղյան հակամարտության բանակցություններին Ղարաբաղի անմիջական մասնակցության վերաբերյալ Հայաստանի վարչապետ Նիկոլ Փաշինյանի հայտարարության վերաբերյալ: Նշենք, որ «Թրենդ»-ի թղթակիցը բանակցություններին մասնակցելու հարցում Ղարաբաղի իշխանությունների փոխարեն օգտագործել էր «Ադրբեջանի օկուպացված տարածքներում ստեղծված անօրինական ռեժիմ» արտահայտությունը: «Թրենդը» փոխանցել էր, որ Արտյոմ Կոժինը ասել էր, թե ընդհանրապես բարձրագոչ հայտարարությունները, որոնք չեն տեղավորվում ԵԱՀԿ-ի ուղենշած գծերի մեջ, հավանաբար կառուցողական չեն: Ադրբեջանական գործակալությունները նաև հրապարակել էին տեսանյութը: Այդ ճեպազրույցից հետո ադրբեջանական լրատվամիջոցները գրել էին, թե Ռուսաստանի արտգործնախարարությունը ոչ կառուցողական է համարում բանակցություններում Ղարաբաղի ընդգրկման Փաշինյանի առաջարկը: Սակայն ըստ «Թրենդ»-ի՝ Ռուսաստանի ԱԳՆ պաշտոնական կայքում տեղադրված հաղորդագրությունում մեկ բառ է փոխվել, ըստ այդմ՝ Արտյոմ Կոժինն ասել, թե «Ձեր բարձրագոչ հայտարարությունները չեն տեղավորվում ԵԱՀԿ-ի նշած ուղեգծում»: Պաշտոնական հաղորդագրությունից հետո հայկական լրատվամիջոցներն էլ գրել էին, թե Ռուսաստանի արտգործնախարարության ճեպազրույցում ադրբեջանցի լրագրողին հանդիմանել են: Ադրբեջանի լրատվամիջոցների կողմից Մարիա Զախարովային ուղղված նամակում նշված է, որ մեկ բառի փոփոխությունը խեղաթյուրել է Արտյոմ Կոժինի պատասխանի իմաստը ու ստացվում է, որ նրա խոսքերը վերաբերում են լրագրողի հարցին, այլ ոչ թե Հայաստանի վարչապետի հայտարարությանը: «Մենք ծանրակշիռ հիմքեր ունենք ենթադրելու, որ հայ-ադրբեջանական ղարաբաղյան հակամարտության խնդրի հրատապությունը և այդ հարցին Ռուսաստանի զգայուն վերաբերմունքը, ինչպես նաև Հայաստանի հետ դիվանագիտական սկանդալի հավանականությունը, Ռուսաստանի արտգործնախարարությանը ստիպել է կոպիտ կեղծիք կատարել: Այդպիսով Ռուսաստանի արտաքին քաղաքականության գերատեսչությունը ոչ միայն խեղաթյուրել է ռուսաստանցի դիվանագետի՝ բանակցային գործընթացի իսկական էությանը համապատասխանող պրոֆեսիոնալ պատասխանը, այլ փորձել է պատասխանատվությունը ամբողջովին դնել լրագրողի վրա, ով կոռեկտ և տեղին հարց է տվել», - Զախարովային ուղղված երկար նամակում գրել է ադրբեջանական մամուլի համայնքը, վերջում նշելով, որ այդ միջադեպը պատիվ չի բերում Ռուսաստանի արտգործնախարարությանը և այդ կեղծիքը պետք է ուղղվի ու վերականգնվի ճշմարտությունը: Ավելի վաղ «Թրենդ»-ը գրել էր, որ հիշյալ ճեպազրույցի մասին Ռուսաստանի արտգործնախարարության պաշտոնական հաղորդագրությունում կատարված կեղծիքը ռուսական ու հայկական մամուլի համար ճանապարհ է բացել անվանարկելու իրենց, նպատակ հետապնդելով զրպարտելու ադրբեջանական լրատվական գործակալությանը: «Թրենդ»-ը օգնության կոչով դիմել էր ադրբեջանական մամուլի համայնքին, մասնավորապես Մամուլի խորհրդին, հորդորելով պաշտպանել իրենց անհիմն հարձակումներից ու շահարկումներից: Օրեր առաջ ՀՀ ԱԺ Արտաքին հարաբերությունների մշտական հանձնաժողովի նախագահ Արմեն Աշոտյանն էր այս միջադեպին անդրադառնում՝ պնդելով, որ հայկական կողմի խնդրանքով է ռուս պաշտոնյայի հայտարարությունը խմբագրվել և ՌԴ ԱԳՆ-ի կայքում տեքստային տարբերակում փոփոխություն արվել, ինչի արդյունքում, ստացվում է, որ ռուս պաշտոնյան հեգնում է ադրբեջանցի լրագրողին, ոչ թե Նիկոլ Փաշինյանին է քննադատում: «Այն ամենը, ինչ պետք է իմանալ այսօրվա սկանդալը ծածկադմբոց անելու անհաջող ու փնթի փորձի մասին։ Ակնհայտ է, որ հայկական կողմի խնդրանքով հետին թվով սրբագրվել է նաև ՌԴ ԱԳՆ կայքում այսօրվա ասուլիսի Արցախյան հիմնախնդրին վերաբերվող հատվածը։ Տեսագրության և արձանագրության միջև առկա կարևոր տարբերությունը վկայում է հայ-ռուսական հարաբերություններում նոր իշխանությունների օրոք ծագած լրջագույն խնդիրների մասին, որոնց կոծկելու փորձերը միայն վատթարացնում են իրավիճակը։ Արտաքին քաղաքականության հիմնախնդիրները հեղափոխական պաթոսով լուծել հնարավոր չէ», գրել էր Աշոտյանը։ Եթե իսկապես հայկական կողմի խնդրանքով է ՌԴ ԱԳՆ խմբագրումներ կատարել, ապա պաշտոնական Երևանն իհարկե, մտորելու պատճառ ունի: Որովհետև, ստացվում է, որ ՌԴ ԱԳՆ ներկայացուցիչն ուղղակի ոչ դիվանագիտական պահվածք է դրսևորել Նիկոլ Փաշինյանի դիրքորոշման առիթով, ինչն էլ, վստահաբար կոնկրետ, վերաբերմունք կարելի է համարել՝ Մոսկվայի կողմից Հայաստանի հեղափոխական իշխանությանը: Ավելին՝ կարելի է ասել, որ ՌԴ ԱԳՆ պաշտոնյայի մեկ նախադասությամբ ներկայացվել է ՌԴ արտաքին քաղաքական գերատեսչության վերաբերմունքը Նիկոլ Փաշինյանի դիրքորոշման նկատմամբ, ինչը խիստ մտահոգիչ է: Թամար Բագրատունի