Ինձ հրավիրեիք ավելի գրագետ կձևակերպեինք. Բագրատյան
«Դեռևս անցյալ տարի բյուջետային քննարկումների ժամանակ հարց բարձրացվեց, թե ինչո՞ւ են ԵՏՄ երկրներից Հայաստան բերվող որոշ ապրանքներ հարկվում ԱԱՀ-ով: Ես միշտ բարձրացրել եմ այս հարցը, վերջին անգամ փետրվարի 2-ի հայտարարությունների ժամանակ, Վալովայան դրանից 10 օր հետո է եկել Հայաստան: Այս բանաձևը, որին ես կողմ կքվեարկեմ, ունի մեկ թերություն՝ ելնում է այս տրամաբանությունից՝ մի հատ մեքենա ես բերում, այդ մի մեքենայի վրա ԱԱՀ չեն գանձում: Իսկ եթե երեքն են բերում, չորսը, հինգը… Ես կողմ կքվեարկեմ, որ մենք ստոպ չտանք էս ապօրինի բանին, որը կատարվում էր: Լավ կլիներ ինձ հրավիրեիք, որ սա գրում էինք, էն ժամանակ ավելի գրագետ կձևակերպեինք: Եթե մենք գրում ենք մի մեքենային ենք տալիս, տակը մի տողով պիտի գրենք՝ մեկ մեքենան ճանաչում ենք ապրանքային միավոր: Կհամաձայնեք, պիտի շտկեք, որ էս սխալը չլինի: Մեքենաների համար եթե ապրանքային միավորը գրված չէ, ուրեմն ես իրավունք ունեմ մեկն էլ բերեմ, երկուսն էլ, երեքն էլ»,-ԱԺում հայտարարեց ԱԺ պատգամավոր Հրանտ Բագրատյանը,երբ քննակվում էր ավելացված արժեքի մասին օրենքի նախագիծը, որով ԵՏՄ երկրներից ավտոմեքենաների ներկրման դեպքում ավելացված արժեքի հարկ չի գանձվելու,մեկ անձը տարվա ընթացքում միայն մեկ ավտոմեքենա կարող է բերել Հայաստան առանց ԱԱՀ վճարելու: «Ինչպե՞ս պետք է վարվել այն գումարի հետ, որն արդեն անցած մեկ տարում գանձվել է մարդկանցից: Ես մի տարբերակ ունեմ՝ եթե բյուջեն փող չունի, ձևակերպեք պետական պարտք և մարեք գոնե առաջիկա հինգ-տասը տարիներին, որպեսզի լուծումը լինի նորմալ: Այլապես, եթե ես գնացել, առել բերել եմ, դուք ինձանից ապօրինի գանձել եք ԱԱՀ-ն, դա մշտապես մնալու է հարց: Առաջարկում եմ դա գոնե պետական արժեթղթերով փոխհատուցել մարդկանց, մինչև պետությունն աստիճանաբար կմարի պարտքը»,- ասաց նա:
Հետևեք մեզ Viber-ում
