ՔԿՀ-ներում պատիժը կրող մարդկանց աշխատանքով ապահովելու ի՞նչ պայմաններ են ստեղծվել

Քրեակատարողական հիմնարկներում իրենց պատիժը կրող մարդկանց աշխատանքով ապահովելու ինչ պայմաններ են ստեղծվել,ՀՀ աշխատանքի և սոցիալական հարցերի նախարար Մանե Թանդիլյանից հետաքրքրվեց «Ելք» խմբակցության պատգամավոր Հրաչ Հակոբյանը:Արդյո՞ք Արդարադատության նախարարության հետ համատեղ Սոցապնախարարության ծրագրերում կա այս խնդրին լուծում տալու հարցը,հետաքրքվեց պատգամավորը: «Մեծ խնդիր է այդտեղ, որովհետև մարդիկ նախկինում աշխատել են, այդ աշխատատեղերը եղել են, բայց այսօր այդ հնարավորությունը չունեն»,-նշեց Հակոբյանը։ Նշենք,որ Սոցիալական և ֆինանսաբյուջետային հարցերի մշտական հանձնաժողովների համատեղ նիստում քննարկվում է  2017թ.-ի պետական բյուջեի կատարման մասին տարեկան հաշվետվությունը: «Թեև այստեղ աշխատանքի առումով քաղաքացիներին լայն ընտրություն հնարավոր չէ տալ, բայց աշխատանքով չապահովելը սահմանափակում է մարդու իրավունքները։ Խնդիրն առկա է, և մենք Արդարադատության նախարարության հետ կաշխատենք»,- նշեց Թանդիլյանը՝ կարևորելով քրեակատարողական հիմնարկներում աշխատատեղերի ստեղծումը: Պատգամավորը նկատեց, թե դա մի շարք կարևոր խնդիրներ կլուծի: «Այս մարդիկ աշխատանքից հոգնած գալիս են, և շատ հարցեր տեղն են ընկնում, օրինակ՝ թղթախաղը և այլն։ Նրանք ժամանակ չեն ունենա, այնպես որ խնդրում եմ՝ ուշադրություն դարձրեք այս հարցին»,-ասաց նա։