Ավանում տեղի ունեցած դեպքերով քաղաքապետարանի և Ավանի աշխատակցներն ազատ են արձակվել.ՀԺ

Ապրիլի 22-ին Ավան վարչական շրջանում ցուցարարների մեքենաները մահակներով ջարդուփշուր արած, զանգվածային անկարգությունների կասկածանքով ձերբակալվածներից երկուսը ազատ է արձակվել: Խոսքը՝ օրեր առաջ ձերբակալված Ավանի թաղապետարանի հարկային բաժնի պետ Կարեն Տոնոյանի եւ Երեւանի քաղաքապետարանի առաջատար մասնագետ Էդմոն Պետրոսյանի մասին է: Նրանց ձերբակալումը մեկ այլ դատավոր իրավաչափ է համարել, սակայն կալանավորման միջնորդությունը քննող դատավորը մերժել է քննիչի միջնորդությունը եւ դատարանի դահլիճից ազատ արձակել երկուսին էլ: Նրանց նկատմամբ որպես խափանման միջոց է ընտրվել երկրից չհեռանալու մասին ստորագրությունը: ՀՀ գլխավոր դատախազությունից երեկ Հայկական ժամանակը հետաքրքրվել է, թե գործը հսկող դատախազը բողոքարկել կամ պատրաստվո՞ւմ է բողոքարկել դատարանի այս որոշումը: Ի պատասխան մեր հարցին հանրային կապերի բաժնից պատասխանեցին հետեւյալը. «Դատախազությունն ուսումնասիրում է գործը եւ դրա համար նախատեսված դատավարական ժամկետներում կհստակեցվեն հետագա ընթացքի լուծմանն առնչվող հարցերը»: Կարեն Տոնոյանին եւ Էդմոն Պետրոսյանին մեղադրանք է առաջադրվել ՀՀ քրեական օրենսգրքի 225 հոդվածով (զանգվածային անկարգություն): Զանգվածային անկարգությունների դեպքի առթիվ հարուցված քրեական գործի շրջանակներում այլ ձերբակալվածներ դեռ չկան: