Հողը կփախչի Ալիևի «ոտքերի տակից»

Մայիսի 28-ից Ադրբեջանի առաջին հանրապետության օրվան նվիրված հավաքի մի խումբ ընդդիմադիր մասնակիցներ բերման էին ենթարկվել և կալանավորվել: Ադրբեջանի իրավապահները թիրախավորել են, մասնավորապես, ընդդիմադիր «Ռեալ» կուսակցության ակտիվիստներին: Այս քաղաքական ուժի անդամներ Նարիման Մուջահիդ Իսմայիլը, Ազեր Գասըմլըն 30 օրվա վարչական կալանքի են ենթարկվել ոստիկանի օրինական պահանջներին չենթարկվելու մեղադրանքով, իսկ Էլմին Խամզան ենթարկվել է 25-օրյա կալանքի: Ակտիվիստ Առաստուն Բախաշալիևի պատիժը դատարանը դեռևս չի որոշել, ևս երկու ակտիվիստներ էլ բերման են ենթարկվել: «Թուրան» գործակալության տվյալներով, ամենայն հավանականությամբ՝ նրանք նույնպես վարչական կալանքի կենթարկվեն: Նշենք, որ մայիսի 28-ին Ադրբեջանի առաջին հանրապետության հարյուրամյակի կապակցությամբ ընդդիմությունը երթ էր կազմակերպել, ինչն ուղեկցվել էր ոստիկանների հետ ոչ մեծ բախումներով: Իրավապահները թույլ չէին տվել, որ ցուցարարները մեծ խմբերով մոտենան առաջին հանրապետությանը նվիրված հուշասյանը: Բաքվում այդ օրը զուգահեռաբար ընթացող երկու միջոցառումների ժամանակ իշխանությունն ու ընդդիմությունը խոսում էին միանգամայն տարբեր Ադրբեջանների մասին: Մայիսի 29-ին Բաքվի Յասամալի շրջանի դատարանը 30 օրվա կալանքի է դատապարտել կուսակցության մեջլիսի ներկայացուցիչ Ազեր Գասըմլիին: Ակտիվիստները մեղադրվում են «ոստիկանության օրինական պահանջներին չենթարկվելու» հատկանիշներով: Իսկ ահա այդ օրն Ալիևն իր ելույթում անդրադարձել էր «բանակի ձեռքբերումներին», տնտեսական հաջողություններին, կայունությանը, «եկամտաբեր» էներգետիկ ծրագրերին, «ժողովրդավարության բարձր մակարդակին» և այլն: Մինչդեռ, ընդդիմադիրների ելույթները վերաբերել են կոռուպցիային, մարդու իրավունքների խախտումներին, այլախոհներին ճնշելուն: Նկատենք, որ տարբեր գնահատականներով՝ Ադրբեջանում շուրջ 140 քաղբանտարկյալ կա, այդ թվում՝ լրագրողներ: Փորձագետների դիտարկմամբ՝ Ադրբեջանի խորհրդարանում չկա գեթ մեկ ընդդիմադիր պատգամավոր: Մամուլի ազատության ինդեքսում այդ երկիրը զբաղեցնում է 163-րդ հորիզոնականը՝ 180 պետությունների շարքում: Ադրբեջանում, ըստ տարբեր փորձագիտական գնահատականների՝ ներիշխանական ծանր պայքար է ընթանում: Այս ֆոնին բողոքի ակցիաները կարող են ճակատագրական դառնալ Ալիևի իշխանության համար, այն առումով, որ հողը կարող է փախչել նրա «ոտքերի տակից»: Դա է պատճառը, որ փողոցում ցանկացած փոքր բողոքի ակցիային Ալիևը նյարդային է արձագանքում: Մետաքսյա Շալունց