Թրամփի հզոր աջակցությունն Ալիևին

Հարավային գազային միջանցքը գործարկելու և «Կասպյան նավթն ու գազը» միջազգային ցուցահանդեսի բացման կապակցությամբ ԱՄՆ-ի նախագահ Դոնալդ Թրամփը նամակ է հղել Ադրբեջանի նախագահ Իլհամ Ալիևին: Ըստ APA գործակալության՝ նամակում նշված է, որ Ադրբեջանի նավթի խոշոր հանքավայրերը նպաստում են միջազգային էներգետիկ շուկայի կայունությանը, իսկ գազի արդյունահանումը՝ Թուրքիայի և Եվրոպայի էներգետիկ անվտանգությանը: Նույն նամակում նաև նշված է Ադրբեջանի տնտեսական և իրավական բարեփոխումներին աջակցելու և հետագա համագործակցության մասին, որպեսզի Կովկասյան տարածաշրջանը լինի ավելի բարգավաճ՝ հանուն խաղաղության և անվտանգության: Այսպես, Թրամփն Ալիևին բաց ասում է՝ Ադրբեջանի նավթի խոշոր հանքավայրերը նպաստում են միջազգային էներգետիկ շուկայի կայունությանը: Ի՞նչ է սա նշանակում... Ավելի քան հստակ մեսիջ, որով կարևորում է Ադրբեջանի նշանակությունը Վաշինգտոնի համար: Այն, որ Միացյալ Նահանգները աջակցություն է ցուցաբերում Հարավային գազային միջանցքին, դա հայտնի է: Օրերս Բաքվում էր ԱՄՆ պետքարտուղարի էներգետիկ հարցերով օգնականի տեղակալ Սանդրա Օուդիրքը: Միացյալ Նահանգների ներկայացուցիչը վստահեցրել է, որ մոտ ապագայում նախագծի մասնակիցները կնշեն Եվրոպա գազի առաջին մատակարարումների մասին: Ինչպես նշել է Սանդրա Օուդիրքը, ԱՄՆ-ի նախագահ Դոնալդ Թրամփը բազմիցս հայտարարել է՝ տվյալ նախագծին իր աջակցության մասին, նշելով, որ Հարավային գազային միջանցքը՝ Եվրոպայի էներգետիկ անվտանգության ապահովմանը հնարավորություն ընձեռնող կարևոր նվաճում է: «Միացյալ Նահանգները թեև անմիջականորեն չեն մասնակցում այդ նախագծին, սակայն միշտ տարբեր կառույցների միջոցով ուժեղ աջակցություն են ցուցաբերում դրան: Նախագծի հաջող ավարտման համար՝ մենք կշարունակենք աշխատել Հարավային գազային միջանցքի գործընկեր երկրների հետ»,-ասել է ԱՄՆ պետքարտուղարի էներգետիկ հարցերով օգնականի տեղակալ Սանդրա Օուդիրքը: Նշենք, որ այս օրերին Բաքվում անցկացվեց՝ Հարավային գազային միջանցքի նախագծի առաջին փուլի գործարկումը: Նախագիծը ներառում է «Բաքու-Թբիլիսի-Էրզրում» գազատարը, Թուրքիայում Անդրանատոլիական խողովակաշարի շինարարությունը և Անդրադրիատիկ խողովակաշարի շինարարությունը: Այդ նախագծի շրջանակներում արդյունահանվող գազը Եվրոպա է մատակարարվելու՝ Ադրբեջանի, Վրաստանի, Թուրքիայի, Հունաստանի, Բուլղարիայի և Ալբանիայի տարածքներով մինչև Իտալիա՝ 3500 կմ ընդհանուր երկարությամբ խողովակաշարի միջոցով: Հարավային գազային միջանցքի իրագործմանը ուղղվել է 40 միլիարդ դոլար: Ադրբեջանի ապացուցված գազի պաշարները կազմում են 2,6 տրիլիոն խմ: Հունիսի 12-ին Էսքիշեհիրում՝ Ադրբեջանի և Թուրքիայի նախագահների մասնակցությամբ կկայանա TANAP-ի պաշտոնական բացումը: Այս օրերին Բաքվում «Կասպյան նավթ և գազ» XXV Միջազգային ցուցահանդես-համաժողովն էր: Ադրբեջանի նախագահ Իլհամ Ալիևը շնորհավորական ուղերձ է հղել ցուցահանդես-համաժողովի մասնակիցներին: Նա իր ուղերձում նշել է, որ Միջազգային նավթային և գազային, նավթավերամշակող և նավթաքիմիական միջազգային ցուցահանդես-կոնֆերանսը, հանդիսանում է Կասպյան տարածաշրջանի նավթի և գազի արդյունաբերության ամենահեղինակավոր միջոցառումը և այս տարի նշում է իր 25-ամյակը: Ներկայում «Հարավային գազային միջանցքի» մաս հանդիսացող «Շահ Դենիզ-2» և «Հարավային Կովկաս» խողովակաշարի ընդլայնումը, ինչպես նաև TANAP- ը և TAP- ի ծրագրերը ներկայումս ընթանում են: Շահ Դենիզ-2 և Հարավային Կովկասի խողովակաշարերի ընդլայնման ծրագրեր արդեն ավարտման փուլում է: Շահ Դենիզ գազի մատակարարման համար առաջարկվող TANAP նախագծի շահագործման մեկնարկը մոտ ապագայում կնշվի: 2020 թվականին ադրբեջանական գազը կտեղափոխվի Եվրոպա: Մետաքսյա Շալունց