Փաշինյանի վերահսկողությունը Սանասարյանի վերահսկողությանը վնաս չէ
Նոր կառավարությունը հետաքրքրական կոնֆիգուրացիա է ներկայացրել Պետական վերահսկողական ծառայությունում: Ինչպես որ միանշանակ չընդունվեց նախկին ժառանգական Դդավիթ Սանասարյանի նշանակումը պետի պաշտոնում, քննադատություններ հետեւեցին ամեն կողմից, որ նա մասնագիտական պատշաճ պատրաստվածություն կարծես թե չունի այդ պաշտոնը լիարժեք ղեկավարելու համար, այնպես էլ նրա տեղակալների նշանակումը միակարծիք չի ընկալվում: Երեկ վարչապետի հրամանով Պետական վերահսկողական ծառայության պետի տեղակալներ են նշանակվել Ալբերտ Աբգարյանը, Հայկ Սարգսյանն ու Տիգրան Ուլիխանյանը: Աբգարյանը Սերժ Սարգսյանի թիմի անդամ է: Մամուլում գրվեց, որ նա աշխատել է նաեւ նախագահի նախկին վերահսկողական ծառայությունում: Առաջին հայացքից զարմանալի է, որ վերահսկողական լծակներ ունեցող առանցքային այս կառույցում տեղ է հատկացվում Սերժ Սարգսյանի թիմի ներկայացուցչին, բայց կառույցի ղեկավարը իր բացատրությունն է ներկայացրել.<<Հարգելիներս, Ալբերտը տասը տարուց ավել իմ ընկերն է, իրեն շատ լավ եմ ճանաչում, չեմ կիսել քաղաքական որոշ մոտեցումներ, բայց իմ կռիվը նաև նրա համար է եղել, որ բազմակարծություն ապահովվի։ Ալբերտը պրոֆեսիոնալ է. և՛ իրավաբան է, և՛ տաղանդավոր կոմպոզիտոր։ Աշխատել է դիմում բողոքների բաժնում ու քաղաքական պաշտոն չի զբաղեցրել։ Վստահ եմ, որ մեծ ներդրում է ունենալու պետաիրավական համակարգի առողջացման գործում։ Վարչապետին ես եմ ներկայացրել Ալբերտի թեկնածությունը, և վարչապետը վստահել է ինձ, մնացածն իմ պատասխանատվության դաշտում է>>։ Ըստ էության այս նշանակման հիմքում ընկած է այն տրամաբանությունը, որ վերահսկողություն իրականացնելիս կառույցն ունենա հնարավորինս անկաշկանդ գործելու հնարավորություն: Դավիթ Սանասարյանը թեեւ Քաղաքացիական պայմանագիր կուսակցության անդամ չէ, բայց հեղափոխության առաջին օրերից Փաշինյանի կողքին է, ու ակամայից ընկալվում է նույն թիմի անդամ: Այս առումով մեծ է հավանականությունը, որ ստուգումներ անցկացնելու առումով նա որոշակի կաշկանդվածություն կունենա ՔՊ-ական նախարարների ղեկավարած ոլորտներում գործունեություն ծավալելու հարցում, ու այդժամ նրան օգնության կհասնի Ալբերտ Աբգարյանը: Բայց ավելի ուշագրավ է տեղակալներից մեկի պաշտոնը Հայկ Սարգսյանին վստահելը: Հայկը Նիկոլ Փաշինյանի թիկնապահներից է, հեղափոխության ընթացքում Փաշինյանի թիկունքից նա չի հեռացել եւ ոչ մի վայրկյան, նա Երեւանի պետական տնտեսագիտական համալսարանն է ավարտել: Փաշինյանը Հայկին ամենայն հավանականությամբ գործուղում է այս կառույց, որպեսզի իր հերթին վերահսկողության տակ պահի Դավիթ Սանասարյանի ու մյուսների գործողությունները: Հիշեցնենք, որ Պետական վերահսկողական ծառայությունը նոր մարմին է, որը կգործի ոչ թե նախագահի վերահսկողության տակ, ինչպես նախկինում էր, այլ վարչապետի:Այս կառույցի ձեւավորումը պայմանավորված է Հայաստանի՝ կառավարման նոր համակարգի անցմամբ։ Պետական վերահսկողական ծառայության լիազորությունները լայն են լինելու. մարմինն ուսումնասիրություններ է անցկացնելու պետական կառավարման համակարգի մարմիններում և հիմնարկներում, հետևելու է կառավարության, վարչապետի որոշումների ու հանձնարարականների կատարման ընթացին, ինչպես նաև վերահսկողություն է ունենալու hակակոռուպցիոն ծրագրերի ու միջոցառումների կատարման նկատմամբ։ Պետական վերահսկողական ծառայությանը լիազորվելու է նաև ուսումնասիրել՝ ճի՞շտ են կառավարվում պետական միջոցները։ Բացի այդ, ՀՀ-ից սուբսիդիա և դրամաշնորհ ստացած անձանց մոտ իրականացնում է ուսումնասիրություններ՝ պետական միջոց տրամադրելու համար հիմք հանդիսացող տեղեկատվության արժանահավատության գնահատման նպատակով։Այս մարմինը նաև կարող է հարուցել կարգապահական վարույթներ։ Ուսումնասիրության արդյունքները զեկուցվում են վարչապետին, և կարող են հիմք հանդիսանալ վարչապետի կողմից համապատասխան հանձնարարականներ տալու և պատասխանատվության միջոցներ կիրառելու համար։ Անի Սահակյան
Հետևեք մեզ Viber-ում
