Գյուղատնտեսական ապրանքների թանկացումից հնարավոր է խուսափել. Բաբկեն Պիպոյան
Գյուղատնտեսական ապրանքների թանկացումից հնարավոր է խուսափել, քանի որ մթերման գինը չի փոխվել, գյուղացին նույն գնով է ապրանքներ տալիս:Այս մասին Tert.am-ի հետ զրույցում ասաց «Իրազեկ և պաշտպանված սպառող» ՀԿ-ի նախագահ Բաբկեն Պիպոյանը: Ըստ նրա` այս պահին խոշոր առևտրի ցանցերի քաղաքականությունը՝ գյուղմթերքը թանկացնելուն միտված, տեղին չէ: «Ո՞վ է ասում, որ մենք գյուղմթերքը պետք է գնենք սուպերմարկետից, ավելին՝ այս հարկման մեխանիզմը պիտի տարվի նրան, որ ՓՄՁ-ները սուպերմարկետների նկատմամբ որոշակի առավելություն ունենան, որ կարողանան մարժա ունենալ»,- շեշտեց Բաբկեն Պիպոյանը: Նա ընդգծեց, որ այսպիսով կարող են ոչ խոշոր առևտրի խանութների շրջանառությունն ավելացնել, մրցակցություն ապահովել: Հիշեցենք, որ մի շարք մթերային առևտրի ցանցեր հանդես են եկել հայտարարությամբ, որում նշված է, որ առևտրային ցանցերի գործունեությունը, գյուղմթերքի գների կայունությունը հայտնվել են ռիսկի տակ՝ հաշվի առնելով մի շարք սկզբունքային հարցեր: Մթերային առևտրային ցանցերը նախազգուշացնում են նաև ներմուծման ծավալների զգալի աճի հնարավորության մասին: Բաբկեն Պիպոյանը կարծում է, որ դրանից խուսափելու ճանապարհ ևս կա: «Ամենատիպիկ օրինակը՝ երբ պետությունն ասում է՝ այո՛, չեմ արգելում լոլիկի մեծածավալ ներմուծում, բայց պարտադրում եմ, որ լոլիկը լինի փաթեթավորված, մակնշված»,- ասաց Բաբկեն Պիպոյանը: Նա ընդգծեց, որ ներմուծվող մթերքների անվտանգության հետ կապված հստակ վերահսկողական մեխանիզմներ են պետք: Բաբկեն Պիպոյանն ընդգծեց, որ գյուղատնտեսական ապրանքների արտադրության մթերման, իրացման, ներմուծման հետ չի կարելի խաղ անել, այնինչ երկար ժամանակ այդպիսի քաղաքականություն է տարվել: «Ամեն ինչ տեղային ստուգողական աշխատանքով է կատարվել: Ես նախկին նախարարին շատ հարգում եմ, բայց մի հայտարարություն հերիք էր, որ ասեինք՝ գյուղոլորտից հեռու է. ասում էր՝ դե շուկա է, գին է թելադրում: Խնդիրն այն է, որ պետք է քաղաքականությունը վերանայվի»,- շեշտեց նա: Հիշեցնենք, որ մթերային առևտրի ցանցերում միսը 15-20 տոկոսով արդեն իսկ թանկացել է:
Հետևեք մեզ Viber-ում
