ՕԵԿ-ի նախկին եւ ներկա խոսնակները լքում են կուսակցությունը
Օրինած երկիր կուսակցությունն աստիճանաբար լքում են երիտասարդները: Կուսակցությունից դուրս գալու դիմում է գրել ՕԵԿ նախկին խոսնակ Արթուր Միսակյանը, այս լուրը նա պաշտոնապես հաստատեց «Իրավունքի» հետ զրույցում: «Այլեւս նպատակահարմար չեմ գտնում իմ անդամակցությունը կուսակցության, այդ պատճառով էլ դուրս եմ գալիս կուսակցությունից»,-նշեց Ա. Միսակյանը: Հարցին, թե պատրաստվում է անդամակցել այլ կուսակցության, մեր զրուցակիցը պատասխանեց.«Այս պահին նման որոշում չկա, զարգացումները ցույց կտան, թե ինչ կլինի եւ որ քաղաքական ուժը կներկայացնեմ ապագայում, կամ առհասարակ կլինի նման ուժ, որի հետ կանցնեմ քաղաքական իմ ուղին: Արդեն մեկ տարի է` 2017 թվականի ապրիլի 2-ից չեմ զբաղվել ակտիվ քաղաքական գործունեությամբ: Բայց ինչպես ասում են` քաղաքական կյանքում ոչինչ բացառված չէ: Ինքս ակտիվ մարդ եմ եւ ունեմ անցած ճանապարհ: Մտածում եմ, որ առաջիկայում ակտիվ քաղաքական կյանքով կզբաղվեմ, թե ինչ ձեւաչափով եւ բովանդակությամբ, այս պահին չեմ կարող ասել»,-նշեց Արթուր Միսակյանը: Դիտարկմանը, արդյո՞ք կուսակցությունից դուրս գալու որոշմանը նպաստել է Հայաստանում տեղի ունեցած քաղաքական ներքին զարգացումները, Ա. Միսակյանը նկատեց, որ դեռեւս ապրիլի 3-ին հայտարարել է, որ մեկ տարի է ինչ ակտիվ քաղաքական գործունեությամբ չի զբաղվում, այսինք, որոշումն այդ իրադարձություններից առաջ է կայացրել: Նշենք, որ Արթուր Միսակյանը ՕԵԿ-ին անդամակցել է 18 տարի: Ի դեպ, կուսակցությունից դուրս գալու դիմում է գրել նաեւ ՕԵԿ խոսնակ Էդգար Առաքելյանը:Նա ֆեյսբուքյան իր էջում գրել է. Հարգելի ընկերներ տեղեկացնում եմ , որ գործունեության այլ ոլորտ տեղափոխվելու պատճառով չեմ հանդիսանալու Հ3 հեռուստաընկերության լրատվական-քաղաքական բաժնի տնօրեն , ինչպես նաև օրեր առաջ դադարեցրել եմ իմ կուսակցական աշխատանքը այդ թվում նաև մամուլի խոսնակի պաշտոնում։Շնորհակալություն եմ հայտնում գործընկերներին համատեղ աշխատանքի համար։Նշեմ նաև, որ գտնվելու եմ Հայաստանում:
Հետևեք մեզ Viber-ում
