Մեկ ատողը չի կարող կանգնեցնել մեծ սերը, որ զգացինք Հայաստանից. Էլթոն Ջոն

Հայկական ժամանակը գրում է . Բրիտանացի աշխարհահռչակ երգիչ, կոմպոզիտոր, երգահան եւ դաշնակահար սըր Էլթոն Ջոնը մեծ տպավորություններով է հեռացել Հայաստանից: Մայիսի 26-ից 27-ը նա Երեւանում էր բարեգործական նախագծի շրջանակներում: Ամուսնու՝ Դեւիդ Ֆըրնիշի հետ ժամանել էր լսողական սարքերի արտադրությամբ զբաղվող Starkey Hearing Foundation կազմակերպության հրավերով, իսկ գնալուց հետո մի շարք հրապարակումներ է արել ինստագրամում: Նա տեղադրել է Հայոց եռագույնը եւ գրել, որ մեծ սեր է զգացել Հայաստանում: «1 ատողը, չի կարող կանգնեցնել այն մեծ սերը, որ զգացինք Հայաստանի կողմից այսօր»,- գրել է նա: Նա շատ շոյված է եղել նաեւ նախագահական նստավայրում ՀՀ նախագահ Արմեն Սարգսյանի ընդունելությունից: Ընդգծել է, որ իր համար մեծ պատիվ է եղել նրա հետ հանդիպելը: «Մեծ պատիվ է, որ այսքան ջերմ ընդունելության արժանացա ՀՀ նախագահ Արմեն Սարգսյանի կողմից: Բազմաթիվ ոգեւորիչ ու ոգեշնչող փոփոխություններ են տեղի ունենում այս գեղեցիկ երկրում: Շնորհակալ եմ բոլորին, որ ինձ ու Դեւիդին այսքան ջերմ ընդունեցիք»,- գրել է նա: Երաժիշտը նաեւ լուսանկար է հրապարակել «Նոր սերունդ» կազմակերպության ներկայացուցիչների հետ: Գրել է, որ նրանք ոգեւշնչում են: «Հայաստան կատարած մարդասիրական այցի շրջանակներում հանդիպեցինք իսկապես ոգեշնչող մարդկանց: Ահա «Նոր սերունդի» թիմը: Նրանք համարձակորեն անանուն ցանց են ստեղծում, որը հնարավորություն է տալիս ԼԳԲՏ համայնքի ներկայացուցիչներին ապահով կերպով ախտորոշել ՄԻԱՎ-ն ու բուժում ստանալ»,- գրել է նա: «Երեւան իմ սեր» հիմնադրամում Էլթոն Ջոնի մասնակցությամբ Starkey Hearing Foundation-ը լսողական սարքեր է բաժանվել դրանց կարիքն ունեցող Հայաստանի մարզերի եւ Արցախի տարբեր տարիքի 100 երեխաների: Միջոցառումը կայացել է «Հայկ եւ Էլզա Թիթիզյան» մանկական վերականգնողական կենտրոնում: «Դժվար է բացատրել այն հաճույքը, որը զգում ես, երբ տեսնում ես, թե ինչպես է ինչ-որ մեկը կյանքում առաջին անգամ նորմալ լսում: Այս տղային հաջողությամբ լսողական սարք տեղադրեցին Starkey Cares թիմի անդամները: Այս հրաշալի բարեգործական նախագիծը շրջագայում է ողջ աշխարհով եւ մարդկանց լսելու պարգեւ շնորհում: Դեւիդն ու ես շատ հպարտ ենք, որ աջակցում ենք նրանց»,- գրել նա հետեւյալ լուսանկարին կից. Այցի ընթացքում երաժիշտն ամուսնու հետ հանդիպել է նաեւ բարձրաստիճան պաշտոնյաների հետ: Բացի այն, որ նրան մշտապես ուղեկցել է ՀՀ նախագահ Արմեն Սարգսյանը, նա նաեւ ընթրել է ՀՀ վարչապետ Նիկոլ Փաշինյանի եւ առաջին տիկնոջ՝ Աննա Հակոբյանի հետ: