«Պարոն Մարտիրոսյան, շարքային դասախոս Լևոն Ներսիսյանին և նրա հորը` հանճարեղ դերասան Հրաչյա Ներսիսյանին հիշելու են բոլորը… իսկ Ձեզ…»
Քաղտեխնոլոգ Կարեն Քոչարյանի հրապարակումը. «Այսօր դիտում էի ԵՊՀ ուսանողների բողոքի ակցիայի տեսանյութը և, չգիտես ինչու, մտածեցի, որ Երևանի պետհամալսարանը ավելի վատ ռեկտոր էլ է ունեցել: Ավելին, այդ ավելի վատ ռեկտորն այսօր Հայաստանի գիտությունների ակադեմիայի նախագահն է: Փորձեմ հիմնավորել խոսքերս:
1999թ նոյեմբերն էր, երբ մահացավ հանճարեղ Լևոն Ներսիսյանը: Մի քանի սերունդների ներկայացուցիչներին հարկ չկա ասելու, թե ով էր Լևոն Ներսիսյանը, բայց երիտասարդներին ուզում եմ ասել, որ Լևոն Ներսիսյանը շատ երկար տարիներ պետհամալսարանում կարդում եր արտասահմանյան գրականություն: Հիմա կասեք հա ի՞նչ կա որ: Բայց նա կարդում էր այնպես, որ այդ լեկցիաներին ներկա էին գտնվում ոչ միայն բանասերները, այլև բժիշկներն ու ինժեներները, նկարիչներն ու մանկավարժները, ճարտարապետներն ու երաժիշտները: Ինքս, լինելով գյուղինստիտուտի մեխֆակի ուսանող, 80-ներին բազմիցս ներկա եմ եղել նրա լեկցիաներին: Սուտ ասեցի. ոչ թե ներկա եմ գտնվել նրա լեկցիաներին, այլ պատիվ եմ ունեցել հիանալ այն ներկայացումներով, որոնք այն ժամանակ կոչվում էին Լևոն Ներսիսյանի լեկցիա: Լևոն Ներսիսյանը մահացավ 1999թ նոյեմբերի 27-ին (հոկտեմբրի 27-ից ուղիղ մեկ ամիս հետո): Եվ Ռադիկ Մարտիրոսյանը, ով այդ ժամանակ ԵՊՀ ռեկտոր էր, արգելեց, որպեսզի Լևոն Ներսիսյանին հուղարկավորեն ԵՊՀ շենքից: Պարոն Մարտիրոսյան, թեև Դուք եղել եք ԵՊՀ ռեկտոր, ինչպես նաև ՀՀ (կամ ինչպես Դուք եք կարծում «քոսոտ երկրի») գիտությունների ակադեմիայի նախագահ, բայց լավ իմացեք, որ շարքային դասախոս Լևոն Ներսիսյանին և նրա հորը` հանճարեղ դերասան Հրաչյա Ներսիսյանին հիշելու են բոլորը… իսկ Ձեզ` եթե անգամ հիշեն էլ, ապա միայն իմ այս գրառման կոնտեքստում»:
Հետևեք մեզ Viber-ում
