Անսեր, անհանդուրժող եւ փոքրոգի

ԱԺ նախագահ Արա Բաբլոյանն այսօր չի մասնակցել Սարդարապատում առաջին Հանրապետության 100-ամյակին նվիրված տոնական միջոցառումներին, ինչը բուռն քննարկումների առիթ է դարձել: ԱԺ աշխատակազմի ղեկավարի տեղակալ Արսեն Բաբայանը պարզաբանում է տարածել այս կապակցությամբ․ «Նախորդ տարիներին ՀՀ Ազգային ժողովը, որպես իշխանության ճյուղ, արարողակարգի համաձայն միջոցառմանը հրավիրված է եղել ամբողջ կազմով։ Այս տարի դրսևորվել է այլ մոտեցում։ Որպես ԱԺ մարմինների ղեկավարներ չեն հրավիրվել հանձնաժողովների նախագահները։ Չեն հրավիրվել Ազգային ժողովի փոխնախագահները և չի հրավիրվել Ազգային ժողովի նախագահը։ Իսկ Արա Բաբլոյանը հրավիրվել է միայն որպես ՀՀ ԱԺ ՀՀԿ խմբակցությանը հատկացված ընդամենը երեք պատգամավորների շարքում։ Ավելին, երբ Ազգային ժողովի աշխատակազմը փորձել է ճշտել ԱԺ նախագահի մասնակցության արարողակարգը, հաշվի առնելով, որ միջոցառման պաշտոնական մասը միշտ իրականացվել է եռյակի մասնակցությամբ՝ Հանրապետության նախագահի, ԱԺ նախագահի և վարչապետի, ԱԺ աշխատակազմին հայտնել են, որ այս տարի Ազգային ժողովի նախագահը չի լինելու նշված եռյակում։ Այսպիսով՝ ՀՀ Ազգային ժողովի նախագահ Արա Բաբլոյանը գտնում է, որ իշխանության առանձին ճյուղի, օրենսդրի նկատմամբ դրսևորվել է ոչ համարժեք վերաբերմունք»,- հայտարարել է նա։ Իսկ ԱԺ փոխնախագահ Էդուարդ Շարմազնովն էլ հստակեցրել է, որ Ազգային ժողովից ընդամենը 13 պատգամավոր են հրավիրել, անուն-ազգանունները գրված. 4 հոգի՝ «Ելք» խմբակցությունից, 3 հոգի՝ Դաշնակցությունից, 3 հոգի՝ «Ծառուկյան» խմբակցությունից, իսկ 58 հոգանոց Հանրապետական խմբակցությունից հրավիրել են Արա Բաբլոյանին, այն էլ ոչ թե որպես ԱԺ նախագահ, այլ ՀՀԿ անդամ, Վահրամ Բաղդասարյանին ու Ֆելիքս Ցոլակյանին: ԱԺ փոխխոսնակի խոսքով՝ ինքը Հայաստանի անկախ պետականությանն 26 տարվա ընթացքում չի հիշում մի դեպք, երբ Ազգային ժողովի փոխնախագահները հրավիրված չէին: Կառավարությունից դեռեւս պարզաբանում չեն ներկայացրել՝ սա ընդամենը իրենց անփորձության հետեւա՞նքն է, թե հատուկ մտածված կերպով են Բաբլոյանին ի պաշտոնե զրկել պատվո հարթակին կանգնելու իրավունքից։ Սակայն ավելի հավանական է, որ սա առավել քաղաքական քայլ է ուղղված խորհրդարանական մեծամասնությանը։ Հասկանալի է, որ նման վերաբերմունքի պայմաններում Բաբլոյանին ուրիշ ոչինչ չէր մնում, քան մերժել հրավերը։ Թավշյա հեղափոխության սկզբունքներից մեկն էր բացառիկ հարգանքը օրենքի, քաղաքական և պետական ինստիտուտների հանդեպ։ Այդ պարագայում խորհրդարանական մեծամասնությանը, առհասարակ օրենսդիր իշխանության նկատմամբ այսպիսի վերաբերմունքը ըստ էության հստակ պլանավորած քայլ է։ Արարքն ամոթալի է, ճղճիմ, փոքրոգի, անձնական ամբիցիաները վեր են դասվել պետական շահից: Մինչդեռ խորհրդարանից բացի պետք է հրավիրվեին նաև ՀՀ առաջին, երկրորդ և երրորդ նախագահները։ ՀՀ բոլոր ժամանակների իշխանություններն անկախ հասարակության տարբեր մոտեցումներից, անկախ մեր ցանկություններից ու քաղաքական գնահատականներից, փաստ են, նրանց գոյությունն արդեն իսկ ամրագրված է մեր պատմության էջերում։ Նիկոլ Փաշինյանը, փաստորեն, օտարում է այսօրվա օրենսդիր իշխանությանը հասարակությունից, սակայն օտարման մանդատ ունի միայն ՀՀ քաղաքացին։ Անի Սահակյան