«Որոշ վարորդներ խախտումներ են անում հենց տեսախցիկների առաջ»
ՃՈ պետի տեղակալ Արմեն Խաչատրյանն այսօր լրագրողների հետ զրույցում տեղեկացրեց, որ հանրության մոտ սխալ կարծիք է ձևավորվել, թե արագաչափերն այլևս չեն գործում: «Թյուրըմբռնումներից խուսափելու համար տեղեկացնեմ, որ տեսահսկող համակարգերը գործում են: Արագաչափերը միշտ գործել են եւ գործելու են»,- հայտարարեց Արմեն Խաչատրյանը՝ վարորդներին հորդորելով իրավախախտումներ թույլ չտալ: Հիշեցնենք՝ կառավարության նիստում օրերս վարչապետ Նիկոլ Փաշինյանը կարծիք էր հայտնել, որ նպատակահարմար է համարում ժամանակավորապես դադարեցնել արագաչափերի գործունեությունը: ՃՈ պետի տեղակալի հաղորդմամբ՝ վերջին օրերին վարորդների իրավախախտումների աճ է գրանցվել. «Քաղաքացիներից զանգեր ենք ստանում եւ պարզ է դառնում, որ որոշ վարորդներ ճիշտ չեն ընկալել այս ամենը եւ խախտումներ են անում անգամ այն վայրերում, որտեղ տեսահսկող սարքեր կան: Բացի այդ՝ վերջին օրերին մի շարք արագաչափերի վնաս է հասցվել կրակելու եւ այլ միջոցներով: 3 արագաչափի գողության փաստ ունենք այս պահին: Հայտարարում ենք, որ արագաչափերը պետական սեփականություն են եւ պատկանում են ոստիկանությանը, եւ նման գործողություններով քաղաքացիները վնաս են հասցնում ՀՀ շահերին»,-եզրափակեց Արմեն Խաչատրյանը:
Հետևեք մեզ Viber-ում
