Ինչ կապ ունի «Լիդիան Ինթերնեշընըլի» հետ. ՀԲՃ-ի բաց նամակը՝ նախագահին
Հայկական բնապահպանական ճակատը բաց նամակով դիմում է արդեն ՀՀ նախագահ Արմեն Սարգսյանին, որպեսզի նա պատասխանի «Լիդիան Ինթերնեշընըլի» հետ իր կապերի մասին հարցերին. «Հարգելի պրն. Սարգսյան, Դեռեւս սույն թվականի փետրվարի 9-ին բաց նամակով դիմել էինք Ձեզ՝ խնդրելով պատասխանել «Lydian International» ընկերությունում Ձեր նախկին գործունեության հետ կապված մի քանի հարցերի, որոնք, սակայն, մինչեւ օրս մնացել են անպատասխան: Նախկին Հայաստանում ընդունված պրատիկա էր հանրային հարցադրումներին չպատասխանելը եւ հանրային պաշտոնյաների գործունեությունը քողարկելը, սակայն հիմա՝ նոր Հայաստանում, նման վարքագծերն անհարիր են դարձել: Հաշվի առնելով, որ Դուք արդեն հանրային պաշտոնյա եք եւ ՀՀ նախագահի պաշտոնում որդեգրել եք բաց գործելաոճ, հաշվի առնելով նաեւ Ամուլսարում ոսկու արդյունահանման ծրագրի հետ կապված շարունակ բարձրաձայնվող խնդիրները՝ խնդրում ենք հրապարակավ պատասխանել մեր հետեւյալ հարցերին. Ի՞նչ շարժառիթներով եք 2013թ. դարձել Լիդիան Ինթերնեշընըլի տնօրենների խորհրդի անդամ: Ո՞վ/քեր (ո՞ր բաժնետեր/երն) է/են առաջադրել ձեր թեկնածությունը: Ի՞նչ պատճառներով եք դուրս եկել տնօրենների խորհրդից: Այս հարցի կապակցությամբ խնդրում ենք հրապարակել ձեր պատասխանը հիմնավորող փաստաթուղթ, օրինակ՝ հեռանալու մասին ձեր զեկուցագիրը Լիդիան Ինթերնեշընըլին։ Խնդրում ենք մանրամասնել, թե արդյո՞ք Ձեր դուրս գալը կապ ունի Ամուլսարում ոսկու հանքավայրի շահագործման վտանգների հետ։ Ի՞նչ առնչություններ եք ունեցել կամ ունեք Knighsbridge Group ընկերությունների խմբի հետ, որն ի թիվս այլ գործունեության, նաեւ ներգրավված է նավթի ու գազի արդյունահանման ծրագրերում»:
Հետևեք մեզ Viber-ում
