Մոսկվայի անսպասելի գաղտնազերծումը
«Թուրքիան իր գործողություններով ապակայունացնում է իրավիճակը Մերձավոր Արևելքում, իսկ Հայաստանը կարևոր դեր ունի խաղաղության ապահովման գործում»,- երեկ Երևանում հայտարարել է Ռուսաստանի Պետդումայի նախագահ Սերգեյ Նարիշկինը: ՀԱՊԿ Խորհրդարանական վեհաժողովի խորհրդի՝ երեկ Երևանում կայացած նիստին Նարիշկինը նաև նշել է. «Հատուկ մտահոգություն են առաջացնում Թուրքիայի կողմից Սիրիայի տարածքի ռմբակոծումները և Թուրքիայի այլ գործողությունները, որոնք ուղղված են այս պայթյունավտանգ տարածաշրջանում իրավիճակի ապակայունացմանը: Հայաստանն իր աշխարհագրական դիրքով միջազգային լարված օջախներին մոտ լինելով՝ կազմակերպության մեջ հատուկ դեր ունի, և մենք պետք է հաշվի առնենք նրա փորձը, այդ թվում և խորհրդարանական փորձը՝ խաղաղության ապահովման գործում»: Ռուսաստանի Պետդումայի նախագահը, ով նաև ՀԱՊԿ Խորհրդարանական վեհաժողովի խորհրդի նախագահն է, Հայաստանի Ազգային ժողովում հայտարարել է, որ այսօր «Էրեբունի» օդանավակայանի օրինակով կծանոթանան կովկասյան տարածաշրջանում ՀԱՊԿ-ի պաշտպանական հնարավորություններին: Նիստի հիմնական մասը փակ է եղել լրագրողների համար: Վեհաժողովում Հայաստանի պատվիրակության ղեկավար՝ Ազգային ժողովի փոխնախագահ Էդուարդ Շարմազանովը նիստից հետո վերահաստատեց՝ Հայաստանն աջակցում է ահաբեկչության դեմ պայքարում Ռուսաստանի գործողություններին: Նաև անդրադարձավ ղարաբաղյան հարցին, հայտարարելով. «Մենք հանցագործություն ենք համարում թուրքական կողմից ռուսական Սու-24 կործանիչի խոցումը, ինչպես և հանցագործություն ենք համարում ղարաբաղա-ադրբեջանական սահմանին Ադրբեջանի կողմից հայկական ուղղաթիռի խոցումը: Մեր կարծիքով՝ ՀԱՊԿ անդամ երկրների պատվիրակությունները բոլոր միջխորհրդարանական հարթակներում պետք է միասնաբար հանդես գան, քանի որ մենք դաշնակիցներ ենք»: Շարմազանովը նաև հայտարարեց, որ Ադրբեջանի կողմից ղարաբաղյան հակամարտությունը ուժային ճանապարհով լուծելու փորձերն անընդունելի են: Իսկ ահա Ռուսաստանի Պետդումայի նախագահն իր խոսքում ղարաբաղյան խնդրին հարկ չի համարել անդրադառնալ, խոսել է միայն «Իսլամական պետություն» և այլ ահաբեկչական խմբավորումների դեմ պայքարի մասին: «Մեր կազմակերպությունն ունի մշտական պատրաստության մեջ գտնվող բավարար ուժ և միջոցներ՝ այդ վտանգներին հակազդելու համար»,- ասել է նա: Դե, ինչ կարիք կա խոսել օրինակ Հայաստանին ու Լեռնային Ղարաբաղին վերաբերող, մեզ` հայերիս հուզող ամենակարևոր հարցի մասին, երբ պարբերաբար կերպով Ադրբեջանը ժամանակ առ ժամանակ սրում է լարվածությունը սահմաններում, ինչի արդյունքում հայ զինծառայողներ են զոհվում: Այսօր Մոսկվան այլ, ավելի կարևոր խնդիրներ ունի` քան Ադրբեջանին զինտեխնիկայի վաճառքի մասին մեզ անհանգստացնող համաձայնագրերը, քան շփման գծում շարունակական դիվերսիաները Ադրբեջանի կողմից և Հայաստանի դեմ Բաքվի դիվանագիտական արշավները` ողողված կեղծիքով և հայատյացության քարոզով: Ու բացի այդ, հետաքրքրական է նաև մեկ այլ հարց` ինչու՞ են ռուսաստանցի բարձրաստիճան պաշտոնյաները հանկարծ որոշել, որ հենց Հայաստանում պետք է բարձրացնեն Սիրայի խնդիրը ու «հատուկ մտահոգություն» հայտնեն, Թուրքիայի կողմից Սիրիայի տարածքի ռմբակոծումների և Թուրքիայի այլ գործողությունների վերաբերյալ: Ինչ է, Ադրբեջանի գործողությունները տարածաշրջանում պայթյունավտանգ իրավիճակի չե՞ն ստեղծում: Իսկ գուցե Ռուսաստանը Թուրքիայի ուղղությամբ այլ «ծրագրեր» ունի՞ Հայաստանի «աջակցության» մասով և ինչ-որ բան է նախապատրաստում... Մետաքսյա Շալունց