«Նկարչության» նկատմամբ Փաշինյանի սերն ու չաշխատող գործիքը
Վարչապետ Նիկոլ Փաշինյանը նախարարների երդմնակալության օրը լրագրողների հետ զրույցում մի քանի հետաքրքրական հայտարարություններ է արել: Առաջինը,նա բացատրել է, թե ինչու վերանշանակեց իր կողմից մշտապես թվանկարչության մեջ մեղադրվող Ազգային վիճակագրության ծառայության կոմիտեի նախագահ Ստեփան Մնացականյանին, որը կպաշտոնավարի առաջիկա վեց տարին: Փաշինյանը այս կապակցությամբ պարզաբանել է.«Այո, նրան մեղադրում էին թվեր նկարելու մեջ, բայց մենք այս նշանակմամբ հակակշիռ ստեղծեցինք, ոչ թե մեր մարդկանց նշանակեցինք ԱՎԾ ղեկավար, այլ փորձեցինք հակակշիռ ստեղծել, որպեսզի որեւէ մեկը, որեւէ մեկի համար թիվ նկարելու կաշկանդվածություն չունենա»: Պարզաբանումը, իհարկե,համոզիչ ավելին, քան կասկածները, որ Նիկոլ Փաշինյանին Ստեփան Մնացականյանի նկարչական հմտություններն են պետք, հակառակ դեպքում՝ նա կարող էր հերթական անփորձ երիտասարդի նշանակել ԱՎԾ պետ, ով ամենամեծ ցանկության դեպքում չէր կարող կեղծել վիճակագրությունը եւ ոլորտին ծանոթանալու ու կեղծիքներ թույլ տալու համար նոր պետը ստիպված լիներ տարիների փորձ կուտակել: Այս առթիվ քննադատություն հնչեց նաեւ նախկին վարչապետ Հրանտ Բագրատյանի կողմից, ով հայտարարեց, որ տնտեսական ստերը շարունակվելու են: Փաշինյանը անդրադարձավ նաեւ ԱԱԾ նորանշանակ տնօրեն Արթուր Վանեցյանի հայտարարությանը, ով խոստացել է կոռուպցիոն բացահայտումներ անել 350 քաղաքացիների ցանկ հրապարակել, որոնք չգիտեն, որ իրենց անուններով բիզենսներ են գրանցված եւ արդյոք սպասել բացահայտումներ նաեւ խոշոր հարկատուների մասով․ «Կարծում եմ, որ և՛ ԱԱԾ-ն, և՛ մյուս բոլոր մարմինները լիարժեք պետք է կատարեն իրենց գործառույթները, և սրանով ամեն ինչ ասված է»,- ուղիղ պատասխանից խուսափել է նա: Ենթադրվում է, որ ԱԱԾ պետի միջոցով նման հայտարարություններով Նիկոլ Փաշինյանը կփորձի ՀՀԿ-ի վրա ազդեցության նոր դաշտ ձեւավորել, այսպես կոչված կոմպրոմատային փաթեթներ կազմել, որոնք հարմար պահի կարող են դրվել քաղաքական հակառակորդների դեմ եւ հստակ խնդիրներ լուծել դրանցով: Օրինակ խոշոր հարկատուներից շատերը ներկայացված են օրենսդիր մարմնում, որտեղ առաջիկայում Փաշինյանի թիմը պատրաստվում է ակտիվ գործունեություն ծավալել, օրենսդրական փաթեթներ պետք է փոխել, գլխավորապես՝ Ընտրական օրենսգիրք, իսկ վճռական այդ քվեարկությունների պահին օգնության կարող են հասնել ձեւավորված դոսիեները: Հակառակ պարագայում պատկան մարմինները պարտավոր են օր առաջ ցանկեր հրապարակել ու փաստարկել, թե ով ինչպես է խուսափել հարկերից ու ինչ ճանապարհով է հարստացել՝ սրանցից բխող պատասխանատվություն սահմանել: Հաջորդ ուշագրավ հայտարարությունը Տարոն Մարգարյանի պաշտոնանկության կոնտեքստում է հնչեցրել: Նախ ակնարկել է, որ այդ պահանջը քաղաքացիներն ինքնաբուխ են բարձրացրել եւ կապ չունի հեղափոխության տրամաբանության հետ.«Ես Տարոն Մարգարյանի հրաժարականը պահանջողներին չէի հորդորել, ես ընդհանրապես մեր քաղաքացիներին հորդորել էի դադարեցնել քաղաքացիական անհնազանդության գործողությունները», իսկ հրաժարականի արդիականության պահանջի մասին հայտնել, որ երբ ինքը հորդորի, Տարոն Մարգարյանը կհետեւի իր հորդորին. «Ես ընդհանրապես մեր հայրենակիցներին հորդորել էի դադարեցնել քաղաքացիական անհնազանդության գործողությունները, որովհետեւ այդ գործողությունների հիմնական իմաստը եւ նպատակն այն էր, որ մենք գործողություններ ձեռնարկենք այն իշխանության դեմ, որը չի վայելում ժողովրդի վստահությունը եւ չի գործում ժողովրդի անունից»,- ասել է Փաշինյանը: Վերջինս ըստ էության հասկացավ, որ անհնար է որոշ պաշտոնյաների դեմ արդյունավետ կիրառել այն գործիքը, որն աշխատեց Սերժ Սարգսյանի պարագայում՝ Գլխավոր դատախազ, քաղաքապետ եւ այլն, որոնց դեմ մի քանի օրվա ցույցերը անհաջողությամբ պսակվեցին: Իսկ ինչ գործողություններ պետք է ձեռնարկի Փաշինյանը նրանց դեպքում, սրա մասին չի մանրամասնել: Խնդիրն այն է, որ ընտրովի եւ ԱԺ-ի մեծամասնության կողմից ընտրված պաշտոնյաներին պաշտոնանկ անելու սահմանադրական հիմքը կարող է լինել միայն ու միայն քաղաքական կոնսենսուսը, կամ նույն կոմպրոմատների փաթեթները, որոնք ոչ բոլորի դեպքում է կարելի կիրառել, բոլորի դեպքում չէ, որ կարելի սա գործիք կիրառել: Անի Սահակյան
Հետևեք մեզ Viber-ում
