ՀՀԿ-ում հույս ունեն, որ Փաշինյանը կընկնի իր լարած թակարդը
Երկրում անկառավարելի քաոսը, տարատեսակ խնդիրների համար բողոքի ակցիաները, չնայած ժամանակավոր դադարին, վերսկսվելու հիմքեր ունեն: Նախորդ իշխանությունների ժամանակաշրջանում կուտակված բազմաթիվ հարցեր ցայսօր էլ մնում են չլուծված, իսկ քաղաքացիները թավշյա հեղափոխության օրինակով հրատապ լուծումներ են առաջադրում: Կային կասկածներ, որ ՀՀԿ-ն գործի է դրել հակահեղափոխության մեքենան եւ որոշ դեպքերում հրահրում է նոր կառավարության դեմ բողոքի ակցիաներ, բայց երկուստեք սաբոտաժի փաստն ու հնարավորությունը հերքվեց: Երեկ՝ նախ Նիկոլ Փաշինյանը կառավարության նիստից առաջ լրագրողներին պատասխանեց, որ երկրում չկա սաբոտաժ ու չի կարող լինել, հետո ավանդույթ դարձած տեսաուղերձով հորդորեց դադարեցնել անհնազանդության ակցիաները, քանի որ դրանք իր խոսքով քաղաքացիներն իրենց դեմ են անում: Եթե շաբաթներ առաջ իրենք մի պահանջ ունեին՝ Սերժ Սսարգսյանի իշխանությունից հեռացում, ապա այդ պահանջի հիմքում այն փաստն էր, որ ժողովուրդը ցանկանում է ունենալ մի իշխանություն, որը հետամուտ կլինի իր խնդիրներին: Փաշինյանի խոսքով՝ այդ իշխանությունն այսօր իրողություն է, ուստի պետք է ունենալ համբերություն եւ ինստիտուցիոնալ ճանապարհով լուծումներ գտնել: Նույն օրը երեկոյան նաեւ ՀՀԿ մամլո խոսնակ Էդուարդ Շշարմազանովը լրագրողների հետ զրույցում ասաց.«Որևէ մեկը չի կարող ասել, որ մենք սաբոտաժի ենք ենթարկում որևէ գործունեություն։ Մենք ունենք մեր կուսակցության շահը, բայց մեզ համար երկրի ներքին կայունությունը ամենակարևորն է, մենք երբեք չենք արել և չենք անի քայլեր, որոնք կվտանգեն մեր քաղաքացիների անվտանգությունն ու զարգացման հնարավորությունը»։ ծ Արդարության դեմ չմեղանչելով փաստենք, որ սա այն բացառիկ դեպքերից է, որ ՀՀԿ-ն չի ստում, որեւէ սաբոտաժ, ինչպես փաստում է Փաշինյանը, այսօր տեղի չի ունենում: Իրականում Հայաստանում, ինչպես արդեն նշեցինք, տարիներով կուտակված խնդիրները մարդկանց հանել են փողոց, որովհետեւ նրանք վայելել են Փաշինյանի ղեկավարած թավշյա հեղափոխության պտուղները, արձանագրել են գրեթե անհնարը՝ Սերժ Սարգսյանի հեռացումը: Հիմա՝ հեղափոխական ժամանակներում, երբ այլեւս իրողություն է նոր իշխանությունը, թեկուզ միայն գործադիր հատվածում, մարդիկ մտածում են, որ սա է այն միակ ուղին, որով կարող են հասնել խնդիրների լուծմանը: Ինչպես Փաշինյանն էր շարժման օրերին կտրականապես մերժում իշխանության հետ ցանկացած բանակցություն, երկխոսություն, քննարկումների սեղան, նույն էլ կարծես թե ցանկություն ունի անելու հասարակությունը: Նրանք պահանջում են, որ իրենց խնդիրը լուծվի հենց այս րոպեին, նրանք պատրաստ չեն սպասել, որովհետեւ իրենց աչքի առաջ ունեն հաջողած փորձը: Ուրիշ ի՞նչ ձեւով կարելի է լուծել այդ խնդիրները, եթե ոչ պարտադրանքի միջոցով: Չէ՞ որ Նիկոլ Փաշինյանն էլ, ըստ էության, այդպես դարձավ վարչապետ: Հետեւաբար արդարացի են քաղաքական ու քաղաքագիտական սթափ շրջանակների պնդումները, որ իրավիճակի միակ ելքը արտահերթ ընտրություններն են՝ նոր Ընտրական օրենսգրքով: Մյուս կողմից, կառավարությունը չի հստակեցնում, թե երբ, ինչ ժամկետներում, ինչ մեխանիզմով է դա հնարավոր: Փաշինյանը նշում է, որ կան բազում մեխանիզմներ, բայց չի բացում փակագծերը, ՀՀԿ-ից էլ հակադարձում են, որ ԱԺ-ն լուծարելու երկու ճանապարհ կա՝ վարչապետի ընտրության տապալում երկու անգամ կամ նրա ներկայացրած ծրագրի տապալում: Սակայն ՀՀԿ-ն այսօր չի մտածում արտահերթ ընտրությունների մասին, ասում է Շարմազնովը. «ՀՀ Սահմանադրությունը հստակ սահմանում է այն դեպքերը, երբ կարող է արձակվել Ազգային ժողովը։ Եվ եթե մենք կողմ ենք քվեարկում կառավարության ծրագրին, ապա խորհրդարանը չի կարող արձակվել։ Քաղաքական իրողությունները շատ արագ են փոխվում, և որևէ մեկը չի կարող ասել, թե ինչ կարող է լինել 3-4 ամիս անց։ Մենք չենք պատրաստվում կառավարության գործունեությունն արհեստականորեն խոչընդոտել»: Ստացվում է, որ ՀՀԿ-ում էլ հույս ունեն, որ Փաշինյանը կհայտնվի իր լարած ծուղակում, եւ քաղաքացիները վաղ թե ուշ նորից փողոց դուրս կգան՝ բողոքելով նրա կառավարության դեմ: Անի Սահակյան
Հետևեք մեզ Viber-ում
