ԱԱԾ տնօրենի կարեւոր հայտարարությունը

Ազգային անվտանգության ծառայությունում կառուցվածքային փոփոխություններ են կատարվելու: Ինչպես հաղորդում է «Արմենպրես»-ը, լրատվամիջոցների ղեկավարների հետ հանդիպմանն այս մասին ասել է ՀՀ ԱԱԾ տնօրեն Արթուր Վանեցյանը: «Հանձնարարել եմ, որ ազգային անվտանգության մարմիններում կառուցվածքային փոփոխություններ կատարվեն, որոնք առաջին հերթին կապված են վարչապետի հանձնարարության հետ: Կարևոր հանգամանք է, որ ԱԱԾ մարմինների կառուցվածքը պահպանում է խորհրդային տարիների պատկերը, հիմա պետք է փոխել, որ այսօրվա պահանջներին համահունչ ու արդյունավետ լուծում տանք», -հայտարարել է Վանեցյանը: «Ներքաղաքական փոփոխությունների հետ կապված բոլորի մոտ տպավորություն էր ստեղծվել, որ դրսից են որևէ մեկին նշանակելու: Իսկ ԱԱԾ-ն իր յուրահատկություններն ու ավանդույթներն ունեցող կառույց է, որը չի ընդունում դրսից մարդ: Իմ նշանակման հետ կապված բոլորը խորը շունչ քաշեցին և հանգստացան, քանի որ նշանակվեց մարդ, որը վերջին համարյա 20 տարին աշխատում է համակարգում: Սկսել եմ ամենացածր պաշտոնից. կրտսեր օպերլիազորից եմ սկսել՝ Մասիսի բաժնում, այնուհետև հասել եմ Երևան քաղաքի վարչության պետի տեղակալ, գնդապետի կոչում եմ ստացել: Կոչումները եղել են շատ սպասված: Համակարգի մարդ եմ և այդպես էլ մնալու եմ, գիտեմ յուրահատկություններն ու առանձնահատկությունները»,-«Արմենպրես»-ի հաղորդմամբ՝ ասաց Վանեցյանը: