Նիկոլ Փաշինյանը «չքցեց» Արմեն Սարգսյանին և Կարեն Կարապետյանին

Նիկոլ Փաշինյանի կառավարությունն ամբողջովին ձևավորված է, հեղափոխական ղեկավարն այն հռչակել է համազգային, սակայն նույն այդ կառավարության նկատմամբ համազգային վախեր ու մտահոգություններ կան: Փաշինյանն իր կաբինետը ձեւավորեց փուլ առ փուլ, սկզբում հեղափոխական երիտասարդ կորիզը տեղ զբաղեցրեց կառավարությունում, չնայած նորանշանակների անփորձության ու որոշների դեպքում մասնագիտական անհամապատասխանության, զերծ մնացինք քննադատությունից՝ համարելով, որ ձեւավորվող կառավարությունը ժամանակավոր է եւ նախեւառաջ հեղափոխական շարունակության տրամաբանության արդյունք, կարճ ասած՝ հաղթողներին չեն դատում, իսկ տղաներն այդ հեղափոխությունն են հաղթել: Այդուհանդերձ կառավարության կաբինետի ձեւավորման վերջնարդյունքից հետո որոշ նախարարների հարցում աչք փակել հնարավոր չէ: Նախ արձանագրենք մի քանի փաստ, որ հեղափոխական Փաշինյանը շրջահայացությունը այդուհանդերձ չկորցրեց առանցքային պաշտոնների դեպքում, հատկապես ֆինանսների նախարարությունը վստահեց Ատոմ Ջանջուղազյանին, որը երկար տարիներ համակարգում է, աշխատել է նախորդ իշխանությունների հետ, սակայն դրանով հանդերձ մնացել է ապաքաղաքական կերպար, իր գործի գիտակ պաշտոնյա: Երկրորդը, նա կատարեց Արմեն Սարգսյանին եւ նախկին վարչապետ Կարեն Կարապետյանին տված խոստումները, որոնց մասին մենք ավելի վաղ գրել էինք: Ըստ դրանց Զոհրապ Մնացականյանին նշանակեց ԱԳՆ պաշտոնում, վերջինս եւ ՀՀ նախագահը մտերիմներ են: Իսկ Կարեն Կարապետյանին էլ խոստացել է, որ ձեռք չի տա իր ընկեր ՊԵԿ նախագահ Վարդան Հարությունյանին: Իհարկե, զարմանալի է, որ չնայած նույն համակարգը շարունակում է ղեկավարել Հարությունյանը, բայց արդեն աչքալուսանքներ են լսվում, որ ներկրումների ընթացակարգը շեշտակի բարելավվել է: Փաշինյանի կառավարությունը ըստ ամենայնի քաղաքական առումով բազմաշերտ է: Կա, սակայն, մի շերտ, որի հետ որեւէ կերպ համակերպվելն անհնար է դառնում: Խոսքն այն նախարարների մասին է, որոնք իրենց աշխարհայացքով, ոչ վաղ անցյալում հրապարակային հայտարարությունների ու գործողությունների պատճառով ոչ միայն միանշանակ ընկալում չունեն, այլեւ ռիսկեր ու վտանգներ են առաջացնում: Բնապահպանության, առողջապահության, մշակույթի նախարարների նշանակման հետ է կապված այդ անհանգստությունը: Նիկոլ Փաշինյանը բնապահպանության նախարար նշանակեց Էրիկ Գրիգորյանին, որը մինչ այս բնապահպանության փոխնախարարն էր, մինչ այդ էլ Գրիգորյանը նախկին վարչապետ Կարեն Կարապետյանի խորհրդական էր: Գրիգորյանի նշանակումից կարճ ժամանակ անց քննադատություններ հնչեցին նրա հասցեին,հայտնի է, որ ոլորտում, հատկապես հանքարդյունաբերության, մշտապես չլուծվող խնդիրներ են եղել, որոնք ըստ մամուլի հրապարակումների եւ բնապահպանների, պաշտոնյանների անունների հետ են կապվել: Իսկ Գրիգորյանը բազում բնապահպանների համոզմամբ այն անձ չէ, որը կարող է դեմ գնալ հոսանքին, քանի որ նա համարվում է Կարապետյանների թիմի անդամ, հետեւաբար նրանց եւ նրանց մտերիմների բիզնես շահերի նկատմամբ անաչառություն դրսեւորել չի կարող: Ֆեյսբուքահայությունը վեր է հանել նաեւ առողջապահության նորանշանակ նախարար Արսեն Թորոսյանի մեկնաբանություններն ու գրառումները պատվաստումների եւ, մասնավորապես, գարդասիլի մասին։ Նոր նախարարը քննադատության թիրախ է դարձել թեմայով իր բավական կոշտ արտահայտությունների համար ու հիմնավոր կասկածներ գցելով, որ մի մարդատյաց նախարարին փոխել ենք մեկ ուրիշ՝ ավելի երիտասարդով: Դե, իսկ մշակույթի նախարարի մասին խոսելն ավելորդ է, մեկօրյա դեգերումներից հետո հանրությունը իմացավ, թե ով է անհայտ Լիլիթ Մակունցը եւ ինչ կապ ունի մշակույթի հետ. պարզվեց նա Նիկոլ Փաշինյանի կնոջ ընկերուհին է, իսկ Փաշինյանը՝ նրա քավորը: Ինչեւէ, նոր կառավարությունն ունի չխամրող լուսավոր կետ, կաբինետի զգալի շերը երիտասարդներ են, իսկ երիտասարդությանը բնորոշ է պայծառ ու կտրուկ քայլեր, մնում է աղոթել ու հուսալ, որ պետությունը այդ քայլերին ու վայրիվերումներին կդիմանա: Անի Սահակյան