Միայն հրաշքը կփրկի. Al-Monitor

RIA Novosti լրատվական գործակալության փոխանցմամբ՝ Թուրքիայի նախագահ Ռեջեփ Էրդողանն իր արտաքին քաղաքականությամբ մեկուսացրել է իր երկիրը, որից նրան կարող է փրկել միայն հրաշքը։ Այդպես է կարծում Al-Monitor-ի հոդվածագիր Քադրի Գուրսելը։ Նա հիշեցնում է, որ Թուրքիայի և Ռուսաստանի հարաբերությունները բարդացել են այն բանից հետո, ինչ թուրքական օդուժը ռուսական ինքնաթիռ խոցեց Սիրիայում: «ԱՄՆ-ի ու արևմտյան մյուս դաշնակիցների հետ Անկարան գտնվում է «վստահության խոր ճգնաժամի» մեջ այն բանից հետո, ինչ թուրքերը սկսեցին հրետակոծել Սիրիայի քրդերի դիրքերը։ Թուրքիայի անելանելի դրությունը խորացնում է նաև նրա նախագահի ներքին քաղաքականությունը։ Ձգտելով ամբողջովին վերահսկել կառավարությանը՝ Էրդողանը սպառնալիքի տակ է դնում իշխող «Արդարություն և զարգացում» կուսակցության (ԱԶԿ) ամբողջականությանը։ Բացի դրանից՝ հայտնի է նաև պետության ղեկավարի և երկրի վարչապետ Ահմեթ Դավութօղլուի հարաբերություններում աճող տարաձայնութունների մասին։ Երկրի հարավարևելյան շրջաններում, որոնք գերազանցապես բնակեցված են քրդերով, ընթանում է «Քրդստանի աշխատավորական» կուսակցության (PKK) դեմ Էրդողանի մարտը, որն իր ավերածությունների ու հումանիտար աղետի ծավալով հիշեցնում է հարևան Սիրիան։ Ընդ որում՝ արյունահեղության վերջը չի երևում։ Անգամ անելանելի վիճակում Էրդողանը չի ցուցադրում որևէ նշան, որ պատրաստ է հրաժարվել նախագահական հանրապետության իր երազանքից, որտեղ ողջ իշխանությունը սահմանադրական պլանում կենտրոնացված կլինի իր ձեռքում։ Էրդողանը դեպի իր երազանք տանող ճանապարհին ընկած արտաքին ու ներքին խոչընդոտները հաղթահարել փորձում է սուննի պահպանողականների աջակցության շնորհիվ և դիմում է իսլամական օրակարգի՝ փորձելով ընտրողներին համոզել, որ ունի «աստվածատուր առաքելություն»,- գրում է հոդվածի հեղինակը։