Շիրակի պետհամալսարանի ռեկտորը հրաժարական է տվել

Շիրակի պետական համալսարանում առկա խնդիրներին լուծում տալու համար կրթության և գիտության նախարար Արայիկ Հարությունյանը հանդիպում է ունեցել բոլոր շահագրգիռ կողմերի հետ, ՇՊՀ-ում լրագրողների հետ զրույցում ասաց նախարարը։ «Ինձ համար այս պրոցեսում անընդունելի էր ոչ ակադեմիական մթնոլորտը, երբ փոխադարձ վիրավորանքների պայմաններում քննարկվում էին Հայաստանի բուհերից մեկի ներքին խնդիրները», - նշեց Ա. Հարությունյանը։ «Այսօր ռեկտորի պաշտոնակատար կնշանակվի Սահակ Մինասյանի տեղակալ Երվանդ Սերոբյանը»,-  հայտարարեց  Արայիկ Հարությոնյանը: «Կողմերի լարվածությունը հանդարտեցնելու համար սա ամենատրամաբանական և ճիշտ լուծումն է: Ես պրոֆեսորադասախոսական կազմին կոչ արեցի այսուհետ իրավիճակը չսրել»,- շարունակեց նախարարը: Վերջինը նշեց, որ ռեկտորի պաշտոնակատարին առաջարկել է համալսարանից հեռացված երկու դասախոսներին առաջիկայում վերականգնել, եթե, իհարկե, դրա հնարավորությունը կա և նոր հունով սկսել աշխատել: «Ես կարծում եմ խնդիրներն այդպես պետք է լուծվեն՝ բանակցությունների, փոխզիջումների ճանապարհով, պետք է հաշվի առնել, որ երկրում իրավիճակ է փոխվել, բայց ամեն ինչ պետք է օրենքի դաշտում լինի»,- եզրափակեց Ա. Հարությունյանը՝ հավելելով, որ հաջորդ շաբաթ կրկին կայցելի Գյումրի՝ հանդիպումներ կունենա ուսանողների և դասախոսների հետ: