Արմավիրի մարզում 29–ամյա վարորդը Ford Transit-ով վրաերթի է ենթարկել 39–ամյա հետիոտնին. վերջինը տեղում մահացել է

Այսօր՝ մայիսի 14-ին, մահվան ելքով վրաերթ է տեղի ունեցել Արմավիրի մարզում: Ժամը 11:30-ի սահմաններում Գայ գյուղի վարչական տարածքում՝ գյուղմթերքի շուկայի տարածքում, Լոռու մարզի բնակիչ, 29-ամյա Արա Աղաջանյանը իր վարած Ford Transit մասկնիշի 74 DA 444 համարանիշի ավտոմեքենայով վրաերթի է ենթարկել Արցախի Հանրապետության Ստեփանակերտ քաղաքի բնակիչ, 39-ամյա Էրիկ Հարությունյանին: Ինչպես հայտնում է ֆոտոլրագրող Գագիկ Շամշյանը, վարորդը փախուստի չի դիմել, փորձել է վրաերթի ենթարկվածին օգնութուն ցուցաբերել, սակայն նա մահացել է: Դեպքի վայր են ժամանել ճանապարհային ոստիկանության 2-րդ սպայական գումարտակի 1-ին վաշտի 1-ին դասակի ծառայողները՝ վաշտի հրամանատար Տիգրան Գրիգորյանի, դասակի հրամանատար Մառլեն Գրիգորյանի գլխավորությամբ: Վթարի մասին ՃՈ 1-77 օպերատիվ կառավարման կենտրոնի պատասխանատու հերթապահ Գեղամ Մարգարյանը տեղեկությունը փոխանցել է ոստիկանության Էջմիածնի բաժին, որտեղից ժամանել է օպերատիվ խումբը՝ բաժնի պետ Գևորգ Հակոբյանի գլխավորությամբ: Ժամանել են նաև Հայաստանի քննչական կոմիտեի Արմավիրի մարզային քննչական վարչության Վաղարշապատի քննչական բաժնի քննիչները՝ բաժնի պետ Կարեն Խաչատրյանի գլխավորությամբ: Փաստի առթիվ քննչական բաժնում հարուցվել է քրեական գործ՝ ՀՀ քր. օր.-ի 242 հոդվածի 2-րդ մսասի հատկանիշներով: Քննիչի հանձնարարակնով ավտոմեքենան տեղափոխվեց ոստիկանության Վաղարշապատի բաժնի պահպանվող հատուկ տարածք: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: