Ո՞վ է Տրանսպորտի, կապի և ՏՏ նոր նախարարը. նախկինում ՀՔԾ քննիչ է եղել (լուսանկարներ)

12:03 - 13/մայիսի/2018

ՀՀ տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը նախկինում եղել է Հատուկ քննչական ծառայության քննիչ։ Նախագահ Արմեն Սարգսյանը երեկ՝ մայիսի 12-ին հրամանագիր է ստորագրել Աշոտ Հակոբյանին նախարար նշանակելու վերաբերյալ։ Հակոբյանը նախարար է նշանակվել «Ծառուկյան» դաշինքի քվոտայով։ Աշոտ Սուրիկի Հակոբյան Ընդհանուր բնույթի հանցագործությունների վարչության պետ, արդարադատության գնդապետ, ծնվել է 1968թ. հունվարի 1-ին Հրազդանում: Բարձրագույն կրթությունը ստացել է Երևանի պետական համալսարանի իրավագիտության ֆակուլտետում, որն ավարտել է 1996 թվականին՝ ստանալով իրավաբան-իրավագետի որակավորում: Մասնագիտական գործունեությունը սկսել է 1998 թվականից ՀՀ ՆԳ և ԱԱ նախարարության քննչական գլխավոր վարչության 3-րդ (հատկապես կարևոր գործերի քննության) վարչությունում` աշխատելով որպես քննիչ, իսկ 2000թ. փետրվարից` ավագ քննիչ: 2005 -2008թթ. ՀՀ ոստիկանության քննչական գլխավոր վարչության Երևան քաղաքի վարչության Կենտրոնական քննչական բաժնի պետի տեղակալ: 2008-2011թթ. ՀՀ ոստիկանության քննչական գլխավոր վարչության հատկապես կարևոր գործերի քննության վարչության` մարդկանց առևտրի (թրաֆիքինգ), թմրամիջոցների ապօրինի շրջանառության և կազմակերպված հանցագործությունների քննության բաժնի պետ: 2011-2014թթ. ՀՀ ոստիկանության քննչական գլխավոր վարչության հատկապես կարևոր գործերի քննության վարչության պետի տեղակալ: 2014թ. հոկտեմբերի 2-ից 2014թ. հոկտեմբերի 20-ը ՀՀ քննչական կոմիտեի Երևան քաղաքի վարչության Ավան և Նոր Նորք վարչական շրջանների քննչական բաժնի պետ: 1986-1988թթ. Ծառայել է Խորհրդային բանակում: Ամուսնացած է, ունի 2 երեխա: Պարգևատրվել է «Ոստիկանությունում գերազանց ծառայության» կրծքանշանով, «Օրենքի պատվար» մեդալով, ՀՀ ոստիկանության պետի հրամանով պարգևատրվել է զենքով (մարտական ատրճանակ), ինչպես նաև տարբեր գերատեսչությունների կողմից արժանացել է բազմաթիվ պատվոգրերի և խրախուսանքների: