ՇՊՀ-ի կառավարման խորհրդի արտահերթ նիստ պետք է հրավիրել. Ֆելիքս Ցոլակյան

ՇՊՀ կառավարման խորհրդի նախագահ Ֆելիքս Ցոլակյանն այսօր իր ֆեյսբուքյան էջում հանդես է եկել հայտարարությամբ՝ Շիրակի պետական համալսարանում ծավալվող իրադարձությունների եւ ռեկտոր Սահակ Մինասյանի հրաժարականի պահանջի հետ կապված: Ֆելիքս Ցոլակյանի տարածած հայտարարության մեջ ասված է.  «Հաշվի առնելով վերջին օրերին ՇՊՀ-ի շուրջ ծավալվող իրադարձությունները, հիմքում ունենալով նաեւ ՇՊՀ-ի որոշ դասախոսների, ուսանողների եւ հասարակական մի շարք կազմակերպությունների կողմից ՇՊՀ-ի կառավարման խորհրդի նիստ գումարելու եւ ռեկտորին անվստահություն հայտնելու հարցը քննարկելու պահանջը, որպես ՇՊՀ-ի կառավարման խորհրդի նախագահ, ղեկավարվելով ՇՊՀ-ի կանոնադրության 39-րդ կետի, ՇՊՀ-ի հիմնադրամի հոգաբարձուների խորհրդի աշխատակարգի 3.3 կետի, ինչպես նաեւ կանոնակարգի 4.7 պահանջներով, այն է. խորհրդի նիստերը կարող են հրավիրվել կրթության բնագավառում պետական կառավարման լիազորված մարմնի կամ հոգաբարձուների խորհուրդի անդամների 1/3-ի առաջարկությամբ կամ ռեկտորի պահանջով, հրապարակային դիմում եմ վերոհիշյալ իրավասու մարմիններին եւ անձանց` սեղմ ժամկետում ՇՊՀ-ի կառավարման խորհրդի արտահերթ նիստ հրավիրելու միջնորդությամբ: Միաժամանակ առաջարկում եմ բոլոր շահագրգիռ կողմերին նիստի օրակարգային այլ հարցերի եւ այդ հարցերը քննարկելու հիմնավորումների վերաբերյալ ներկայացնել առաջարկություններ խորհրդի քարտուղարություն»: Նշենք, որ ՇՊՀ-ում վերջին 7 ամիսների ընթացքում խաթարված է ուսումնական գործընթացը: Դասախոսների մի մասն ու ուսանողներն ընդդիմանում են ռեկտոր Սահակ Մինասյանի կողմից վարվող քաղաքականությանը: Համալսարանում անընդհատ դասադուլներ եւ բողոքի ակցիաներ են կազմակերպվում: