Մայրը պնդում է՝ հայրն առևանգել է իր 2 անչափահաս երեխաներին, իսկ իրավապահ մարմինները երեխաներին չեն վերադարձնում մորը

Երևանի քաղաքի բնակիչ, ազգությամբ ռուս Նիկոլ Պարազյանը հանդիսանում է 6-ամյա Նարեկ Պարազյանի և 3-ամյա Աշոտ Պարազյանի մայրը: Կինը Հովհաննես Պարազյանի հետ ամուսնացել է 2014 թվականին, ունեցել են 2 երեխա՝ Նարեկին և Աշոտին: Ինչ-ինչ պատճառներով նրանց համատեղ կյանքը չի ստացվել և 2017 թվականին Նիկոլը բաժանվել է ամուսնուց և երեխաների հետ վերադարձել է Երևան՝ մշտական բնակության: 2018 թվականի ապրիլի 6-ին տատիկը երեխաների հետ դուրս է եկել՝ Հյուսիսային պողոտայում զբոսնելու: Այդ ժամանակ Հովհաննեսն առանց կնոջ՝ Նիկոլի իմացության, վերցրել է երեխաներին և մոր բազմաթիվ խնդրանքների և պահանջների արդյուքում հաջորդ օրը վերադարձրել է միայն 3-ամյա Աշոտին: Օրեր առաջ՝ մայիսի 5-ին, կրկին Հյուսիսային պողոտայից բռնի ուժով հայրը վերցրել է 3-ամյա Աշոտին և վազելով փախել, որի ժամանակ երեխան ընկել, հարված է ստացել գլխի հատվածում, սակայն նա վերցրել է երեխային և հեռացել: SHAMSHYAN.com-ի թղթակցի հետ զրույցում Ն. Պարազյանի փաստաբան Տիգրան Մուրադյանը անդրադարձավ գործի նյութերին, մանրամասն ներկայացրեց եղելությունը և իր դժգոհությունը հայտնեց ոստիկանությունից ու Դատական ակտերի հարկադիր կատարման ծառայությունից՝ ասելով. «Երեխաներին առևանգելու գործերով կան դատարանի որոշումներ, որ երեխաները պետք է վերադարձվեն մորը, սակայն որոշումները փաստացի չեն կատարվում: Ոստիկանությունը ասում է, որ դա ԴԱՀԿ-ի գործն է, ԴԱՀԿ-ն ասում է, որ ոստիկանությոն գործն է: Հետախուզում չեն իրականացնում, այն դեպքում, երբ ունեն որոշակի տվյալներ՝ երեխաների գտնվելու վայրերի մասին: Նրանց համար երեխաներին հայտնաբերելը ժամերի խնդիր է, սակայն չեն ուզում գործել: Իմ կարծիքով, ոստիկանությունը ու ԴԱՀԿ-ն եկել են համաձայնության, դրա համար չեն ուզում կատարել իրենց պարտականությունները: Այժմ 6-ամյա Նարեկը գտնվում է Ռուսաստանում, հայրը թողել է այնտեղ, իսկ ինքը Հայաստանում է: Ոստիկանության և ԴԱՀԿ-ի անգործության փաստով ես դիմում եմ գրել Հատուկ քննչական ծառայություն»: Երեխաների մայրը նույնպես ներկայացրեց նախկին ամուսնու բռնի գործողությունները և խնդրեց, որ գործին հետամուտ լինեն իրավապահ համակարգի բարձրաստիճան պաշտոնյաները և երեխաներին վերադարձնեն իրեն: