Սամվել Բալասանյանի դեմ պաշտոնանկության գործընթաց է նախապատրաստվում

«Ժողովուրդ» թերթը գրում է. «Գյումրիի քաղաքապետ Սամվել Բալասանյանի դեմ պաշտոնանկության գործընթաց է նախապատրաստվում: Այդ մասին «Ժողովուրդ» օրաթերթի հետ զրույցում հայտարարել է ԱԺ նախկին պատգամավոր, ՕԵԿ-ական Հովհաննես Մարգարյանը: «Մենք ընդդիմությունում ունենք 16 ավագանու անդամ, նրանցից 11-ի ստորագրությամբ կներկայացվի ավագանու թեկնածու և փակ, գաղտնի քվեարկություն տեղի կունենա: Թեկնածուն ընտրվելու է: Հստակ, շատ կարճ ժամկետում պետք է կազմակերպենք, դա նշանակում է` անվստահություն գործող քաղաքապետին: Ովքեր եղել են ընդդիմությունը ներկայացնող ցուցակը գլխավորողները` Վահան Խաչատրյան, Վարդևան Գրիգորյան, Հովհաննես Մարգարյան, կկազմակերպենք բաց, թափանցիկ գործընթաց, որպեսզի ժողովուրդն իրազեկ լինի, և կփորձենք ներկայացնել թեկնածու»,- ասել է նա: Հիշեցնենք, որ 2016 թվականի ապրիլին Գյումրիում կայացած ՏԻՄ ընտրություններին «Բալասանյան» դաշինքը ստացել էր 17, ԲՀԿ-ն` 8, ՀՎԿ և ԳԱԼԱ կուսակցությունները` 4 մանդատ»: Առավել մանրամասն՝ թերթի այսօրվա համարում: