Լարված իրավիճակ Արագածոտնի մարզում

Այսօր՝ մայիսի 10-ին, լարված իրավիճակ է ստեղծվել Արագածոտնի մարզում։ Եղիպատրուշ գյուղի բնակիչներն արգելել են, որպեսզի ծանր տեխնիկան շարունակի աշխատանքներ կատարել Ապարան-Եղիպատրուշ ավտոճանապարհի՝ Եղիպատրուշի վարչական տարածքում։ Ֆոտոլրագրող Գագիկ Շամշյանի հետ զրույցում գյուղացիներն ասում էին. «Կապի և տրանսպորտի նախարարությունն ու «Հայավտոճան»-ը Ճանշինի հետ գյուղ մտնող ճանապարհն ամբողջովին հիմնանորոգել են։ 30 տարուց ավելի մարդաբոյ փոսերով էինք գյուղ մտնում, դուրս գալիս։ Ավտոմեքենաները կոտրվում էին, շտապօգնությունն անգամ գյուղ գալու համար 1 ժամ էր պահանջվում, իսկ հիմա, երբ ճանապարհն ամբողջովին դարձել է իդեալական, հաշված րոպեների ընթացքում կարողանում ենք ազատ տեղաշարժվել։ Արդեն մի քանի օր է՝ ինչ-որ մարդիկ փորձում են ծանր տեխնիկաներով աշխատանքներ կատարել, ինչի արդյունքում ճանապարհի հերն անիծվում է։ Տրակտորների՝ գործի դնելու արդյունքում ճանապարհների եզրերին հսկայական փոսեր են առաջացել։ Պահանջում ենք պատկան մարմիններից, որպեսզի հետամուտ լինեն և արգելեն ծանր տեխնիկայի շահագործումը նշված հատվածներում։ Հակառակ դեպքում կարճ ժամանակ անց նորից կունենանք վատ, մարդաբոյ փոսեր հիշեցնող ճանապարհներ»։ Գյուղացիների մի մասը նշում էին, որ այդ ամենի ետևում կանգնած է Ապարանի քաղաքապետ Կարեն Եղիազարյանը, ով հանրությանն ավելի շատ հայտնի է «Գնթունիկի Կարեն» մականվամբ։ Մի մասը նշում էին, որ նրա ցուցումով է «ավիրվում» ճանապարհը, մի մասն էլ նշում էին, որ նրա գիտությամբ։