Ամերիկահայ բարերար ու գործարար Գարո Արմենի ուղերձը Փաշինյանին

Ամերիկահայ խոշոր գործարար եւ ազգային բարերար Գարո Արմենը (ՆյուՅորք) շնորհավորական ուղերձ է հղել Նիկոլ Փաշինյանին ու խոստացել, որ իր միլիոնների հասնող ներդրումներն ավելի արդյունավետ կլինեն: «Շնորհավորում եմ Նիկոլ Փաշինյանին՝ Հայաստանի Հանրապետության վարչապետի պաշտոնում ընտրվելու կապակցությամբ: Սա սովորական ընտրություն չէր: Սա ժողովրդական եւ ազգային հաղթանակի արդյունք էր: Առաջին անգամ իր պատմության մեջ Հայաստանի Երրորդ Հանրապետությունն ունեցավ իրապես ժողովրդական առաջնորդ, եւ առաջին անգամ ստեղծվեց հնարավորություն՝ կերտելու իրապես ժողովրդավարական երկիր: Իր նախընտրական խոսքում Փաշինյանը խոսեց սփյուռքի եւ ներդրումների  մասին: Նրա ծրագրային այդ դրույթն անհրաժեշտ է կյանքի կոչել: Անցյալ տարիների ընթացքում ես տասնյակ միլիոնավոր դոլարների ներդրումներ եմ բերել Հայաստան: Իրականացրել ենք ծավալուն ծրագրեր՝ նպաստել ենք երկրի ինֆրակառույցների նորոգմանը: Եվ այդ ամենն անելիս՝ ես երբեւէ չեմ հետապնդել որեւէ տնտեսական շահ, չեմ ներգրավվել որեւէ գործարքում: Եղել են պահեր,  երբ դժվարություն եմ ունեցել համոզելու պոտենցյալ նվիրատուներին՝ մեր ծրագրին մասնակցելու, որովհետեւ չի եղել վստահություն, չի եղել արդարություն Հայաստանում: Հիմա այդ արգելքն այլեւս վերացած է: Որպես գործարար եւ որպես բարերար՝ վստահ եմ, որ մեր աշխատանքն այժմ առավել արդյունավետ եւ առավել լայնամասշտաբ է լինելու: Ես հավատում եմ Նիկոլ Փաշինյանին եւ որպես սփյուռքի ներկայացուցիչ՝ կոչ անում իմ գործընկերներին՝ խոշոր գործարարներին, գալու Հայաստան եւ շենացնելու մեր բոլորի հայրենիքը: Իմ մասնակցությունն այդ գործին այսուհետ առավել ընդգրկուն եւ առավել խորքային է լինելու: Կրկին շնորհավորում եմ Նիկոլ Փաշինյանին եւ, իհարկե, նախեւառաջ մեր ողջ ժողովրդին ու նրա աննման երիտասարդությանը՝ պատմական հաղթանակի կապակցությամբ, հայտնում անվերապահ աջակցություն եւ մաղթում նոր Հայաստանի կառուցման գործում լիակատար եւ փայլուն նվաճումներ:  Գարո Արմեն Նյու Յորք»