ՀՅԴ-ն մենակ չթողեց Ռոբերտ Քոչարյանին, այնուհետև Սերժ Սարգսյանին, իսկ հիմա էլ չի պատրաստվում մենակ թողնել Նիկոլ Փաշինյանին

«Իրատես»-ը գրում է. «Լևոն Տեր-Պետրոսյան-ՀՅԴ հին կռիվը նորից է թարմացել։ Այն ժամանակ, երբ որոշվում է երկրի ճակատագիրը, առաջին նախագահը զարմանալիորեն, ինչպես ինքն է ասում, անդրադառնում է մի «մանրուքի»։ Տեր-Պետրոսյանը խոսում է ոչ թե երկրում ստեղծված իրավիճակի, այլ ժամանակին իր իսկ կասեցրած կուսակցության գործունեության մեկ դրվագի մասին։ Աղվան Վարդանյանը, ըստ նրա, չպետք է կուսակցության որոշմամբ վայր դնի մանդատը։

Չխորանալով սահմանադրական այս վեճի մեջ, ընդամենը արձանագրենք, թե ինչու առաջին նախագահը ներքաղաքական լարված իրադրությունը թողած, խոսում է Աղվան Վարդանյանի մանդատից։ Ի միջի այլոց, այսօր շատերն են ցանկանում լսել, թե ինչ կարծիք ունի Տեր-Պետրոսյանն այս շարժման մասին, բայց նա լռում է. սա շա՜տ հետաքրքիր ու տարօրինակ լռություն է։ Իսկ ՀՅԴ-ն, «ոխը սրտում», արձագանքում է։

«Առաջին նախագահն է ակտիվացել, մեկ բաժակ ջրում փորձեցին փոթորիկ ման գալ։ Աղվան Վարդանյանն իր համոզմունքով ու խղճով է առաջնորդվել, ի՞նչ կա այստեղ անհասկանալի։ Համոզմունքով առաջնորդվելով` դեմ է քվեարկել, խղճով առաջնորդվելով` մանդատը վայր է դրել», - ասել է Արմեն Ռուստամյանը, հավելելով, որ մարդիկ ցնցումների մեջ են ընկնում ՀՅԴ-ի ավանդույթներից։

Սակայն դաշնակցականը չի ասում` ավանդույթնե՞րն են ավելի զորեղ, թե՞ Հայաստանի մայր օրենքը։ Չի ասում նաև` տարիներ շարունակ այդ նույն ավանդույթի ուժո՞վ է ՀՅԴ-ն ջրի երեսին մնում` այս կամ այն իշխանության թևի տակ ծվարելով։

Դաշնակցական Արմեն Ռուստամյանը մոռանում է իրենց մեկ այլ ավանդույթի մասին էլ հիշատակել։

«Մենք մեր ողջ կարողություններով աջակցելու ենք, շարժման խնդիրների լուծումը պետք է տեղափոխվի այլ ինստիտուցիոնալ կառույցներ, և ՀՅԴ-ն պատրաստ է իր ներուժը դնել, որ հանկարծ չձախողվի արարման փուլը։ Մենք չենք պատրաստվում մենակ թողնել Նիկոլ Փաշինյանին», - ասում է Ռուստամյանը։

Ակամա հիշում ես, թե ինչպես ժամանակին ՀՅԴ-ն մենակ չթողեց Ռոբերտ Քոչարյանին, այնուհետև Սերժ Սարգսյանին, իսկ հիմա էլ չի պատրաստվում մենակ թողնելու Նիկոլ Փաշինյանին։ Վատ ավանդույթ չէ, չնայած ասում են, թե հին ընկերները չեն դավաճանում»։