Ում կզոհաբերեն ՀՀԿ-ում

Հանրապետական խմբակցության ղեկավար Վահրամ Բաղդասարյանը Ազգային ժողովում ճեպազրույցների ժամին ուշագրավ հայտարարություն է արել։ Պատասխանելով հարցին, որ վարչապետ լինելու դեպքում Նիկոլ Փաշինյանին են ենթարկվելու ուժային կառույցները, և կան տեղեկություններ, որ չի բացառվում՝ ՀՀԿ-ից բազմաթիվ պատգամավորներ դուրս գան, և արդյունքում՝ ՀՀԿ-ն դառնա փոքրամասնություն, Բաղդասարյանը հեգնեց որակելով՝ «ենթադրությունների կամ երազանքների գիրկն ընկնել». «Նախ՝ որևէ ուժային կառույց որևէ մեկի սեփականությունը չէ, առավել ևս՝ սիրո, համերաշխության կոչ անողները, այդ ուժային իշխանությունները ժողովրդինն են»,- ասաց նա՝ մոռանալով, որ տարիներ շարունակ ՀՀԿ-ն, ի դեմս ղեկավարի, ոստիկանության, ԱԱԾ-ի, դատախազության ողջ ռեսուրսը օգտագործել է նախեւառաջ հանուն սեփական շահի, նույն ՀՀԿ-ի իշխանության ժամանակահատվածում ԱԱԾ-ն ուշի ուշով հետեւել է իշխանության ներկայացուցիչների շարժին, ու ձեւավորվել են կոմպրոմատների հսկա փաթեթներ, որոնք էլ պահել են ՀՀԿ-ի միասնականությունը։ Մայիսի 8-ից սկսած իրավիճակը գլխիվայր շուռ է գալու, այնպես որ, ասել, թե այդ խոսակցությունները երազանքի պես բան են, կնշանակի ոչինչ չասել։ Սակայն Բաղդասարյանը ավելի ուշագրավ հայտարարություն է արել։ Ինչպես գիտենք, ՀՀԿ-ում քաղաքական որոշում է կայացվել աջակցել Փաշինյանին ընտրության պահին, ապահովել պահանջվող քվեները, որպեսզի Հայաստանն ունենա վարչապետ։ Եւ ինչպես Վահրամ Բաղդասարյանն է ասել՝ ՀՀԿ-ի այդ որոշումը բացառապես կայացվել է իրավիճակը չապակայունացնելու, չսրելու համար։ Այդ որոշումից հետո ինչպես ՀՀԿ խմբակցության ղեկավարը, այնպես էլ շատերը միեւնույն ժամանակ հայտարարել են, որ ՀՀԿ-ն միասնական է ու մայիսի 8-ին էլ լինելու է միասնական, դիրքորոշումը չի փոխելու։ Այսօր Վահրամ Բաղդասարյանը վերահաստատել է այդ պնդումը, ասելով, որ առնետավազքի մասին ենթադրություններ կային նաև նախկինում, իսկ իրականությունը երևաց ամսի 1-ին, սակայն, եթե անգամ լինի այդպիսի վիճակ, կարևոր չէ, թե քանի հոգի կլինի խմբակցությունը, կարևորը քաղաքական դիրքորոշման մեջ փոփոխություն չլինելն է. «Ես ձեզ հավատացնում եմ, որ դա չի լինի»: Թե ո՞վքեր են քվեարկելու Փաշինյանի օգտին, արդյոք օլիգարխնե՞րը, Վ.Բաղդասարյանը պատասխանեց, որ դա կքննարկեն այսօր կայանալիք ՀՀԿ ԳՄ նիստում, և իրենց որոշումից որևէ մեկը չի շեղվի: Այսպիսով, պարզից էլ պարզ է, որ ՀՀԿ-ն Փաշինյանի օգտին քվեարկելու վերաբերյալ ընտրություն է կատարելու այնպիսի պատգամավորների շրջանակում, որոնք այսպես ասած հեռու են ՀՀԿ-ի դիրքորոշումն ու գաղափարախոսությունը ներկայացնելուց, նրանք մարդիկ են, որոնք նպատակահարմարությունից ելնելով մտել են ՀՀԿ, ապա՝ նաեւ խորհրդարան, ընտրություններին աշխատել կուսակցության օգտին, որպեսզի հետո քաղաքական ապահով տանիքի տակ գործեն, որպեսզի հետագա տարիներին նրանք առհասարակ բիզնես ծավալելու հնարավորություն ունենան ու իշխանության հարկային տեռորներին չենթարկվեն։ Այսինքն ՀՀԿ-ն «ժերտվա» է տալու մարդկանց, որոնց օգտագործել է բոլոր ժամանակներում, նրանք որքան էլ արժանանան հանրության համակրանքին՝ Փաշինյանին կողմ քվեարկելով, սակայն խոշոր հաշվով ընկալվելու են կամազուրկներ, որոնց ըստ նպատակահարմարության ասելու են «գյադեք էս կողմ, գյադեք էն կողմ», հենց սա է, որ կարող է համապատասխան հետեւությունների պատճառ դառնալ ու ՀՀԿ-ն զրկվի անգամ խորհրդարանական իշխանությունից։ Մինչդեռ ՀՀԿ-ում կարող էին նման հայտարարություններից զերծ մնալ, չշեշտել, որ միասնական են ու չեն փոխել դիրքորոշումը, գաղտնի պայմանավորվածություն ունենալով՝ հայտարարեին ազատ քվեարկություն։ Անի Սահակյան