Օդանավակայանից մենք կշարժվենք դեպի Հանրապետության հրապարակ. Փաշինյանը ներկայացրել է այսօրվա և վաղվա միջոցառումները
Հայաստանի վարչապետի թեկնածու Նիկոլ Փաշինյանը տեսաուղերձ է տարածել՝ նշելով, որ ինքն այսօր օդանավակայանում դիմավորելու է Սերժ Թանկյանին: Նա քաղաքացիներին կոչ է արել սպասել օդանավակայան մուտքի մոտ, որից հետո միասին կշարժվեն Հանրապետության հրապարակ, որտեղ կկայանա դիմավորման պաշտոնական արարողությունը: Հրապարակում ելույթ կունենան Փաշինյանը և Թանկյանը:
«Ես ուզում եմ ասել, որ արդեն քանի օր գրասենյակային պայմաններում եմ աշխատում եւ բավական բարդ, ծանր աշխատանքային առօրյա է: Իրականում այս առօրյան ավելի բարդ եւ ավելի պատասխանատու չէ, քան այն առօրյան, որ մենք ունենում էինք Հանրապետության հրապարակում մեր հեղափոխության ընթացքում: Բայց ուզում եմ անկեղծ գտնվել՝ այն ամբողջ շփումը, որ ես ունենում էի ձեզ հետ, ավելի մեծ էներգիա էր տալիս:
Ես ուզում եմ մի քանի կազմակերպչական հարցեր հստակեցնել: Այսօր՝ ժամը 20-ին, Սերժ Թանկյանը ժամանում է Երեւան, ինչպես գիտեք: Ես Սերժ Թանկյանին կդիմավորեմ օդանավակայանի սրահներից մեկում, մենք միասին դուրս կգանք: Ուզում եմ կոչ անել, որ մարդիկ, քաղաքացիները մեզ սպասեն օդանավակայանի այն տարածքում, որտեղ մեծ կարասի շիշ է դրված: Մենք դուրս կգանք, կողջունենք ձեզ, հետո միասին կգնանք դեպի Հանրապետության հրապարակ, որտեղ տեղի կունենա դիմավորման պաշտոնական արարողությունը, ես ու Սերժը ելույթ կունենանք, տեղի կունենա հանրահավաքի նման միջոցառում:
Տեղեկացնեմ նաեւ, որ այսօր ոստիկանությունը լիարժեք ծառայություն կիրականացնի եւ՛ Հանրապետության հրապարակում, եւ՛ օդանավակայանի տարածքում ու ճանապարհի երկայնքով եւ ես հույս ունեմ, որ դուք՝ ՀՀ քաղաքացիներդ, ինչպես նախկինում, մենք բոլորս ջերմ հարաբերություններ կպահպանենք ոստիկանության հետ, եղբայրական միջավայր:
Իհարկե գիտեք, որ վաղն Ազգային ժողովում տեղի են ունենալու ՀՀ վարչապետի ընտրություններ, քաղաքական խորհրդակցությունների արդյունքում կարող եմ ասել, որ այս պահին որեւէ կասկած չկա, որ վարչապետի ընտրությունը կարող է տեղի չունենալ: Ես հույս ունեմ, որ ամեն ինչ կանցնի մեր պլանավորածի նման ու ԱԺ-ն ժողովրդի թեկնածուին կընտրի վարչապետ, հետո մենք նորից կհանդիպենք Հանրապետության հրապարակում: Հույս ունեմ վաղն էլ դուք կհավաքվեք Հանրապետության հրապարակում, վաղ առավոտից կհետեւեք այդ ամբողջ գործընթացին, որից հետո ես կգամ հրապարակ, հետո, ամենայն հավանականությամբ, կսկսեմ իրականացնել ՀՀ վարչապետի պարտականությունները, եթե իհարկե խանգարող որեւէ ազդակ տեղի չունենա»:
Հետևեք մեզ Viber-ում
