Արման Մելիքյանը՝ ՌԴ դեսպանատան վերջին հայտարարության մասին

ՌԴ դեսպանատան վերջին հայտարարությունը դիտարկում եմ որպես միանգամայն դրական ուղերձ: Իսկապես, միայն այն փաստը, որ ՌԴ նախագահ Վլադիմիր Պուտինը հնարավոր համարեց Հայաստանի համար բախտորոշ պահին զանգահարել ՀՀ փոխվարչապետ Կարեն Կարապետյանին՝ բավականին տհաճ տպավորություն թողեց և շատերի մոտ այն համոզմունքն առաջացրեց, ըստ որի ռուսաստանյան իշխանությունները որոշել են միանշանակորեն աջակցել ՀՀԿ-ին՝ իշխանությունը պահելու հարցում: Այդ և հաջորդ օրը փոխվեց նաև մինչ այդ հարաբերական չեզոքություն պահող ռուսական ԶԼՄ-ների լրատվության տոնայնությունը՝ Նիկոլ Փաշինյանին սկսեցին ներկայացնել որպես կոշտ, անզիջում, վերջնագրային մոտեցումներով առաջնորդվող գործչի: Բարեբախտաբար Մոսկվայում բավականին արագ կողմնորոշվեցին և պաշտոնական մեկնաբանությունների մակարդակում կրկին վերադարձան հավասարակշիռ ու բարյացկամ հայտարարությունների տիրույթ: Իսկ այն, որ որոշ ռուսաստանցի քաղաքական գործիչներ, լրագրող-մեկնաբաններ ու փորձագետներ դեռ շարունակում են կիրառել հակահայկական հռետորաբանություն, մի իրողություն է, որին պետք է հանգիստ վերաբերվել, բայց նաև բոլոր հնարավոր միջոցներով կոշտ հակազդել՝ տխմար հերյուրանքներն, ամեն դեպքում, չպետք է անպատասխան մնան: Որքան գիտեմ, ՌԴ-ում ՀՀ դեսպան Վարդան Տողանյանն արդեն իսկ հանդես է եկել բավականին կոշտ հայտարարությամբ: Արման Մելիքյան