Պետք է պակասեցվեն վարչապետի լիազորությունները. Ռուստամյան
«Կարող եմ մեր կողմից վստահեցնել, որ կքվեարկենք Փաշինյանի օգտին: Բայց քաղաքականության մեջ ոչինչ բացառել չի կարելի։ Կարծում եմ, որ եթե ՀՀԿ-ն երկրորդ անգամ էլ հայտարարի մի բան և բոլորովին այլ բան անի, սա արդեն քաղաքական ուժի համար է վտանգավոր», - լրագրողների հետ ճեպազրույցում ասաց ՀՅԴ խմբակցության ղեկավար Արմեն Ռուստամյանը՝ խոսելով վաղը սպասվելիք վարչապետի ընտրությունների մասին: «Խորհրդարանական արտահերթ ընտրությունները չեն բխում ՀՀԿ շահերից։ ՀՀԿ շահերից բխում է, որպեսզի վաղը Նիկոլ Փաշինյանն ընտրվի վարչապետ։Սա կլինի միակ ճիշտ լուծումը վաղվա համար», - նշեց նա։ «Ընտրություններից հետո Սահմանադրական փոփոխություններ պետք է կատարվեն, մասնավորապես՝ պակասեցվեն վարչապետի լիազորությունները։Ոստիկանության, ազգային անվտանգության նկատմամբ վերահսկողություն ունենալը բխում է խորհրդարանական համակարգի տրամաբանությունից։ Դրանց նկատմամբ վերահսկողություն նաև ԱԺ-ն պետք է ունենա», - նշեց նա։ ՀՅԴ-ն չունի կառավարության մաս կազմելու ակնկալիք հարցին , Ռուստամյանը պատասխանեց, որ իրենք նման ակնկալիք չունեն, բայց ուզում են, որ Փաշինյանի կառավարությունը հաջողի և լուծի իր առջև դրած խնդիրները. «Մեր բոլոր կարողություններով աջակցելու ենք, որ դա հաջողի:Ես ազգային համաձայնության կառավարություն ստեղծելը տրամաբանական եմ համարում»,-ընդգծեց նա:
Հետևեք մեզ Viber-ում
