Բաքվում պատերազմի մեկնարկի պատեհության մասին արդեն բաց են խոսում

Ադրբեջանից ավելի ու ավելի մտահոգիչ ենթատեքստերով մեկնաբանություններ են հնչում հայաստանյան իրադարձությունների ֆոնին՝ ղարաբաղյան պատերազմի բռնկման հավանականության մասին: Ադրբեջանական «Թուրան» գործակալությանը տված հարցազրույցում Ադրբեջանի նախկին արտգործնախարար Թոֆիկ Զուլֆուգարովը մեկնաբանել է հայաստանյան իրադարձությունները և դրանց հնարավոր ազդեցությունը ղարաբաղյան հակամարտության կարգավորման գործընթացի վրա: Նրա կարծիքով՝ Սերժ Սարգսյանի հրաժարականին հանգեցրած ճգնաժամի պատճառներից մեկը «ղարաբաղյան կլանի» կողմից իշխանության չարաշահումն էր: Ըստ Զուլֆուգարովի, այդ կլանի արտաքին ու ներքին քաղաքականությունը հանրության ու մտավորականության կողմից մերժվում էր, կլանի ներկայացուցիչներն ընկալվում էին որպես «պրովինցիալներ», ինչը և, վերջին հաշվով, հանգեցրեց քաղաքական հակամարտության: Թոֆիկ Զուլֆուգարովը համարում է, որ ներհայաստանյան ճգնաժամը Արևմուտքի և Ռուսաստանի շահերի բախման հետևանք չէ, Հայաստանն իր կողմը ձգելու՝ Արևմուտքի փորձը չէ: Ադրբեջանի նախկին արտգործնախարարի գնահատմամբ՝ Հայաստանն ԱՄՆ-ի համար աշխարհաքաղաքական որևէ նշանակության չունի, ինչի պատճառով Վաշինգտոնը կհակադրվեր Ռուսաստանին: Ինչ վերաբերում է Մոսկվայի դիրքորոշմանը, ապա Զուլֆուգարովի դիտարկմամբ՝ ի տարբերություն Վրաստանում և Ուկրաինայում տեղի ունեցած նմանատիպ գործընթացների, Հայաստանի պարագայում Մոսկվայի արձագանքը շատ հանգիստ է և զուսպ: Նա նշել է, թե Մոսկվան խորհրդարանական փոքր պատվիրակություն է գործուղել Հայաստան, կազմված հայամետ պատգամավորներից, սակայն որևէ կոնկրետ քայլ չի ձեռնարկել: Ադրբեջանի նախկին արտգործնախարարի խոսքով՝ դա ցույց է տալիս, որ Ռուսաստանը կորցնում է հետաքրքրությունը Հայաստանի հանդեպ՝ որպես «ֆորպոստի»: Լեռնային Ղարաբաղի խնդրի հետ կապված՝ նա կարծիք է հայտնել, թե հայաստանյան գործընթացները շատ լուրջ ազդեցություն կունենան Ղարաբաղի խնդրի կարգավորման գործընթացի վրա: «Եթե Ռուսաստանը լքի Հայաստանը, ապա հայերը հույսը կդնեն միայն իրենց հնարավորությունների վրա: Եթե դա տեղի ունենա, ապա իրական խաղաղությունը հնարավոր է, բայց ավելի հավանական է, որ իրական խաղաղությունը հաստատվի ռազմական ինչ-ինչ գործողություններից հետո»,- ասել է Թոֆիկ Զուլֆուգարովը: Վերջինս դիտարկմամբ՝ տարիներ շարունակ հայկական քարոզչությունը հանրային կարծիք է ձևավորել, թե հայկական բանակից ավելի ուժեղը չկա: «Ապրիլյան պատերազմը սթափեցրեց նրանց, իսկ այս ճգնաժամից հետո նրանք շատ կթուլանան, ինչն ազդեցություն կունենա ղարաբաղյան խնդրի վրա»,- կարծիք է հայտնել Ադրբեջանի նախկին արտգործնախարարը: Հայաստանում տիրող ներկա վիճակն Ադրբեջանն ինչպե՞ս պետք է օգտագործի, այս հարցին Թոֆիկ Զուլֆուգարովը հետևյալ պատասխանն է տվել՝ Ադրբեջանը պետք է ուշադիր հետևի իրավիճակին և պատրաստ լինի ցանկացած շրջադարձի՝ և՛ խաղաղ բանակցությունների, և՛ ռազմական գործողությունների: «Կարծում եմ, դա արդեն արվում է: Ամեն ինչն իր ժամանակն ունի: Ժամանակին արված քայլը արժեքավոր է լինում, հատկապես երբ այն վերաբերում է Ղարաբաղին: Ռազմական գործողությունը կարող է ծանր հետևանքներ ունենալ, և նման որոշում ընդունելը բարդ է: Բայց, եթե հայերը մեզ այլ ելք չթողնեն, նշանակում է՝ մենք պետք է կատարենք այդ քայլը»,- ասել է Ադրբեջանի նախկին արտգործնախարար Թոֆիկ Զուլֆուգարովը: Իսկ Ադրբեջանի Միլի Մեջլիսի պատգամավոր Գուդրաթ Հասանգուլիևն առաջարկել է հրավիրել Լեռնային Ղարաբաղի հարցով հատուկ նիստ` կապված Հայաստանում տեղի ունեցող իրադարձությունների հետ։ Ըստ ադրբեջանական ԱՊԱ գործակալության՝ պատգամավորը կարծիք է հայտնել, որ «սադրիչները կարող են խախտել հրադադարի ռեժիմը»։ «Մենք պետք է ժամանակին որոշում կայացնենք։ Սպասվում է, որ Հայաստանում մոտ ժամանակներում կարող է քաղաքացիական պատերազմ սկսվել։ Մենք պետք է ուշադիր հետևենք իրավիճակին»,- ասել է նա։ Մետաքսյա Շալունց