ՀՀԿ-ն ճաքեր է տվել, իշխանափոխությունն իրողություն է

Խորհրդարանում այսօր աննախադեպ բան տեղի ունեցավ, ԱԺ-ն չկարողացավ ընտրել Սահմանադրական դատարանի անդամ։ Այդ պաշտոնում ներկայացված էր նախագահ Արմեն Սարգսյանի կողմից առաջադրված մեկ թեկնածու՝ Էմիլ Բաբայանը։ Ինչպես հայտնի է ԱԺ-ում եւ առհասարակ քաղաքական դաշտում ընդդիմադիր ՀՅԴ-ի, Ելք-ի եւ «Ծառուկյան» դաշինքի միջեւ կոնսենսուս է ձեւավորվել, խորհրդարանական ընդդիմությունը երեկ Էմիլ Բաբայանին քննադատության ենթարկելուց հետո այսօր ընտրությունները բոյկոտի ենթարկեցին։ Արդյունքում մասնակցեց 54 պատգամավոր, որոնցից 51-ը կողմ քվեարկեցին, 3-ը՝ դեմ, սակայն պահանջվում էր 63 ձայն։ Հիշեցնենք, որ Էմիլ Բաբայանը Լեռնային Ղարաբաղի նախագահի խորհրդականն էր, ում խորհրդարանում ներկայացնում էր ՀՀԿ խմբակցության պատգամավոր, Եվրոպական դատարանում Հայաստանի ներկայացուցիչ Գևորգ Կոստանյանը։40-ամյա Բաբայանի առավելությունների մասին խոսելիս Կոստանյանը երեկ հորդորում էր պատգամավորներին, անկախ կուսակցական պատկանելիությունից և շահերից, քվեարկել նրա օգտին․ «Ես իրոք խոսում եմ բացարձակ պրոֆեսիոնալիզմի մասին: Եվ մի անձի մասին, որ ես համոզմունք ունեմ, որ մեր երկրին նախ շատ օգուտներ տվել է և դեռևս տալու է»:«Ելք» խմբակցության պատգամավոր Արտակ Զեյնալյանը, դիմելով Կոստանյանին, հարցրեց, թե ինչու հենց Էմիլ Բաբայանը , ինչու մրցույթ չի հայտարարվել եւ թեկնածուներից ընտրվել ամենաարժանավորը, որպեսզի ինչպես Զեյնալյանն էր ասում՝ «մենք այս պաշտոնում ընտրենք այնպիսի մեկին, ով ոչ միայն կունենա բարձր մասնագիտական գիտելիքներ, այլ նաև կհամապատասխանի դատավորի չափանիշներին»: Գևորգ Կոստանյանը, սակայն, հակադարձեց, թե այս դեպքում մրցույթի անցկացումը պարտադիր չէ․ «Սահմանադրական կարգավորումների պարագայում այս թեկնածուին առաջադրում է Հանրապետության նախագահը: Այսինքն, դա խմբակցությունը չի առաջադրել, կուսակցությունը չի առաջադրել: Բացարձակապես դրանով է պայմանավորված, ուրիշ ոչ մի տրամաբանություն չկա դրա մեջ»: Հիշեցնենք, որ մի քանի օր առաջ երեք տասնյակ հասարակական կազմակերպություններ դիմել են Ազգային ժողովի նախագահ Արա Բաբլոյանին՝ խնդրելով չընտրել Սահմանադրական դատարանի դատավորի թափուր տեղի համար նախագահ Արմեն Սարգսյանի առաջադրած թեկնածուին: Իրավապաշտպան գործունեությամբ զբաղվող կազմակերպությունները նույնպես պնդում էին, որ նախագահ Սարգսյանը պետք է առաջին հերթին մրցույթ անցկացներ և հնարավորություն տար բարձրակարգ իրավաբաններին մասնակցություն ունենալ դրանում։ Հակառակ դեպքում այսպիսի նշանակումները և ընտրությունները հովանավորչության և ոչ թափանցիկ և հակաժողովրդավարակաան ավանդույթների առկայության հիմնավոր կասկածներ են հարուցում։ Փաստաբան Տիգրան Եգորյանը նույնիսկ բացահայտել էր Բաբայանի կրթության հետ կապված խութեր։ Ուսումնասիրելով նրա կենսագրականը՝ պարզել է, որ կրթությանը զուգահեռ նա ծառայել է զինված ուժերում։ Բացի այդ, «Վարդանանց» անունով համալսարանը, որտեղ ուսանել է սահմանադրական դատարանի անդամի թեկնածուն, ըստ պետռեգսիտրի, գրանցվել է 1996-ին, մինչդեռ Ազգային ժողով ներկայացված Բաբայանի կենսագրությունում նշված է, նա այդ համալսարանում ուսանել է 1994-ից սկսած։ Այսպիսով՝ այսօր ԱԺ-ում կատարվածը ցույց տվեց, որ չնայած Փաշինյանը դեռ չի ընտրվել վարչապետի պաշտոնում, այդուհանդերձ իշխանափոխությունն արդեն իրողություն է, այնպես որ, Փաշինյանի ծրագրերը ապագայում առանց խոչընդոտների թերեւս կյանքի կկոչվեն։ Անի Սահակյան