Իրենց պայքարը պաշտոնների համար չէր

Հրապարակ օրաթերթը գրում է. Չնայած Նիկոլ Փաշինյանը դե ֆակտո դեռ չի ընտրվել վարչապետ, նրա թիմը ձեռնամուխ է եղել ապագա կառավարության կազմի շուրջ քննարկումներին։ ԱԳ նախարարի պոստում տրվում են Դանիայի այսօրվա դեսպան, ԱԳ նախկին նախարար Ալեքսանդր Արզումանյանի, ինչպես նաեւ Կարապետ Ռուբինյանի որդու՝ Ռուբեն Ռուբինյանի անունները: Երեկ մեր հարցին ի պատասխան՝ ճի՞շտ է, որ Դուք պաշտոն չեք ցանկանում, բայց դեմ չեք լինի դեսպան նշանակվել որեւէ երկրում, օրինակ` ԱՄՆ-ում, քանի որ այնտեղ սովորել եք, տեսել եք Թրամփին, նկարվել հարգարժան Ռամսֆելդի հետ, շարժման ակտիվիստ Դավիթ Սանասարյանն ասաց, որ իրենց պայքարը դրա համար չէր, պայքարը դեռ չի ավարտվել, ինքը պատրաստվում է առաջիկա ընտրություններին: Իսկ ինչպե՞ս եք վերաբերվում այն հանգամանքին, որ ձեր շարժման, այսպես ասած, հենարաններից մեկն էլ ԲՀԿ-ն ու Գագիկ Ծառուկյանն են, որն օլիգարխ է։ «Հարցը պետք է ուղղել Նիկոլին եւ ոչ ինձ. Գագիկ Ծառուկյանն ասել է` ինքն աջակցում է ժողովրդական շարժմանը»: