Որն է՞ Փաշինյանի գլխավորած կառավարության կազմը

Այսօր լրագրողների հետ հանդիպմանը Երևանի ավագանու անդամ Արայիկ Հարությունյանն ասաց, որ կառավարությունը, ամենայն հավանականությամբ, ձևավորվելու է Կառավարություն համաժողովրդական շարժման թեկնածուի գլխավորությամբ և տեղի կունենան փոփոխություններ Ընտրական օրենսգրքում։  «Այլևս ամոթալի երևույթ է դարձել հանրության լայն շրջանակներում 10 հազար դրամներով ընտրություն կատարելը, իսկ ինչ վերաբերում է մայիսի 1-ին՝ ՀՀԿ-ական շատ պատգամավորներ կողմ են եղել Նիկոլ Փաշինյանի վարչապետի թեկնածությանը։ Առաջին տպավորությունն այն է եղել, որ Հանրապետականի ներսում շատ մեծ ճնշում է եղել պատգամավորների վրա, որովհետև մինչ այդ կային պատգամավորական խմբեր, որոնք հայտնում էին, որ աջակցելու են Նիկոլ Փաշինյանի թեկնածությանը։ Ճնշում եղել է պատգամավորների վրա, դրա համար տեղի են ունեցել փոփոխություններ և միասնական են հանդես եկել»։ Հարցին՝ նոր կառավարությունում կադրերի հարցն ինչպե՞ս է լուծվելու, նա պատասխանեց. «Կազմի հարց չի քննարկվել, և դա հիմնականում կապված է եղել այն լարված ներքաղաքական իրավիճակի հետ, որ կար Հայաստանում։ Առաջիկա մեկ-երկու օրերին այդ քննարկումը կլինի։ «Քաղաքացիական պայմանագիրն» ունի կադրային բավարար ռեսուրսներ, բայց նոր կառավարությունը չի լինելու միանձնյա ձևավորման կառավարություն։ Ազգային համաձայնության կառավարություն է լինելու և դաշտում առկա արհեստավարժ կադրերը տեղ կգտնեն կառավարությունում»։