«Ռուսաստանցի սահմանապահները կշարունակեն պաշտպանել հայ-թուրքական սահմանը». Նիկոլ Փաշինյան
РИА Новости-ի փոխանցմամբ ,ՀՀ ԱԺ «Ելք» խմբակցության ընդդիմադիր պատգամավոր, քաղաքացիական անհնազանդության շարժման առաջնորդ Նիկոլ Փաշինյանը «Կոմերսանտ» թերթին տված հարցազրույցում հայտարարել է, որ երկրում քաղաքական իրավիճակը կարելի է կոտրել «նրբորեն»: «Կոմերսանտ»-ի թղթակիցը Փաշինյանից հարցրել է` ինչպես է նա պատրաստվում հաջողությամբ ավարտին հասցնել իր իսկ սկսած շարժումը: «Հանրապետականներն արդեն իսկ հեռացել են, սակայն առայժմ չգիտեն դրա մասին, չեն գիտակցում: Նրանք ցանկանում էին իրենց սադրիչ պահվածքով ջղայնացնել մարդկանց: Երեքշաբթի օրը խորհրդարանում նրանց ուզածը հենց դա էր, սակայն նրանք իրենց ուզածին չհասան, տեղի ունեցավ հակառակը»,-նշել է Փաշինյանը՝ հավելելով.– «Հանրապետականների ցանկացած քայլն իրենց դեմ է աշխատելու: Պետք է ըմբռնել, որ նրանք տարբերակներ չունեն»: Նա նաև անդրադարձել է Ռուսաստանի արձագանքին՝ Հայաստանում տիրող իրավիճակի վերաբերյալ, այն գնահատել է դրական: «Մենք վստահություն ունենք, որ Ռուսաստանում հարգում են մեր շարժումը և հայ ժողովրդի կարծիքը, որ նրանք չեն միջամտի մեր ներքին գործերին, այնպես, ինչպես Հայաաստանը չի միջամտի Ռուսաստանի ներքին գործերին: Կան կենսական հարցեր, որոնց մասին պետք է խոսել և որոնք պետք է լուծել: Հայաստանն ու Ռուսաստանը ռազմավարական գործընկերներ են, դաշնակիցներ և մնալու են այդպիսին: Հայաստանը մնալու է Եվրասիական տնտեսական միության կազմում, կմնա Հավաքական անվտանգության պայմանագրի կազմակերպությունում: Ռուսաստանցի սահմանապահները կշարունակեն պաշտպանել հայ-թուրքական սահմանը: Այդ ամենը երաշխավորված է և այդ ամենի մասին այլևս խոսել պետք չէ»,-ասել է Փաշինանը:
Հետևեք մեզ Viber-ում
