Սերժ Թանկյանը խոստացել է գալ Հայաստան

Հայտնի ռոք երաժիշտ, «System of a Down» խմբի մենակատար Սերժ Թանկյանը #ԻմՔայլը նախաձեռնության մասնակից ժողովրդին կոչ է անում շարունակել սկսած ճանապարհը: Նա այդ մասին գրառում է կատարել ֆեյսբուքի իր էջում: Երաժիշտը եւս մեկ անգամ նշել է, որ չի կարողացել Հայաստան գալ առողջական խնդիրների պատճառով, եւ խոստացել է գալ: «Հանրապետական կուսակցությունը, որը ղեկավարել է Հայաստանը վերջին 20 տարիների ընթացքում, չպահեց իր խոստումը, որ խոչընդոտ չի հանդիսանա ժողովրդի թեկնածուի՝ Նիկոլ Փաշինյանի որպես վարչապետ ընտրությանը: Նրանք փորձում են ժամանակ շահել, որպեսզի իրենց առաջնորդներից մի քանիսը, որոնք տարիներ շարունակ թալանել են երկիրը, կարողանան իմունիտետ ձեռք բերել իրենց գործողությունների համար: Ժողովուրդը դա թույլ չի տա: Ժողովրդին հակառակվելն ապարդյուն է: Իմ հաղորդագրությունը ծողովրդին հետեւյալն է. Հայաստանի իմ սիրելի՛ հաղթած քույրեր ու եղբայրներ, ողջո՛ւյն: Շատ տխուր եմ, որ մինչեւ հիմա սարսափելի վիրուսի պատճառով չեմ կարողացել անձամբ միանալ ձեզ, բայց ձեզ ջանասիրաբար հետեւել եմ ու մեկնաբանություններ եմ գրել, երբ կարծել եմ, որ դա կարող է նշանակություն ունենալ: Խոստանում եմ շուտով այդտեղ լինել Երկար տարիների անարդարությունից հետո դուք հաղթել եք այս ճակատամարտում: Մեր երկրի ներկան ու ապագան պաշտպանված է ձեր խաղաղ եւ խոհեմ գործողությունների շնորհիվ: Մի նահանջեք, որովհետեւ երբ էլ լինեն ընտրությունները՝ 30, 60, թե 100 օրից, կամ եթե նույնիսկ դուք բոյկոտեք, դուք փոփոխությունը շոշափելի կդարձնեք: Եթե Նիկոլ Փաշինյանը լինի վարչապետ այդ փոփոխությունները հնարավորինս շուտ կգան, սակայն, եթե նույնիսկ նա չընտրվի, դուք կանեք այդ փոփոխությունները: Տեղիք մի տվեք զայրույթին ու վրդովմունքին եւ պահպանեք դրական տրամադրվածությունը: Հաղթողները չեն կորցնում իրենց սթափությունը: Դժվար է փոխել խորհրդանիշները: Ավելի դժվար է փոխել իշխանություններին, իսկ ամենադժվարը մշակույթը փոխելն է: Դուք արդեն արել եք ամենադժվարը: Սիրելի՛ քույրեր եւ եղբայրներ, հավատացեք ինձ, երբ ասում եմ, որ արդարությունը կհաղթի, այն միշտ հաղթում է, եւ դա հաշվադեպ է տեղի ունենում խորհրդարանների դահլիճներում: Ողջ աշխարհը պաշտում է ձեզ քաղաքացիական անհնազանդության ձեր հաղթանակի համար: Եկեք շարունակենք այս ճանապարհը»,- գրել է Թանկյանը: