Եթե ժողովուրդը մի անգամ էլ պարտվի, լուծումը զենքի դաշտում է լինելու

Այսօր ԱԺ հատուկ նիստում վարչապետի թեկնածուի քննարկման ժամանակ «Ելք» խմբակցության պատգամավոր Արամ Սարգսյանը հայտարարեց. «Մենք խոսում ենք ամեն ինչից, մոռանում ենք էականը, հիմնականը, ամենակարևորը՝ մենք չենք խոսում այսօրվա իրավիճակից, չենք փորձում գտնել ելքեր, մենք պարփակվել ենք էս դահլիճում, ուզում ենք ելք գտնել էս դահլիճում՝ մոռանալով, որ ելք կա նաև փողոցում, որ հարյուր-հազարավոր մարդիկ հավաքվել են փողոցում»,- ասաց Ա.Սարգսյանը։ Ըստ նրա՝ այսօրվա իրավիճակը խախտված ընտրությունների հետևանք է, ընտրության ժամանակ է, որ մարդը տեսնում է, որ ինքն է իշխանության տերը, հաղթած և պարտված կողմերն ընդունում են, որ իրենք հաղթել և պարտվել են արդար ընտրությունների արդյունքում, և միայն այդ պարագայում է, որ քաղաքական միտքն է զարգանում, աշխարհն ընդունում է, որ Հայաստանը ժողովրդավար երկիր է. «Այս խնդրի մասին այսօր պետք է մտածենք։ Նիկոլ Փաշինյանն այն մարդն է, ում անունն աշխարհի հայությունը տալիս է ամենաշատը, ինքն է գարանտը, որ կարող է արդար ընտրություն անցկացնել»,- ասաց պատգամավորը և շարունակեց. «Երբ լեգիտիմ իշխանություն կա, քեզ հարգում են, բա նման հնարավորությունը, վերելքը, որ ունենք, ժողովուրդն է չէ՞ փողոցում: Եթե ժողովուրդը մի անգամ էլ պարտվի, լուծումը զենքի դաշտում է լինելու: Եղբորիցս հետո որևէ վարչապետի ծրագիր ներկայացնելու ժամանակ, նաև իմ, որևէ մեկի պատասխաններն էսքան հստակ, պատրաստված չեն եղել, ինչքան Նիկոլինը»: