Էս շարժը ամեն ինչի վրա ազդել է. Սամվել Ալեքսանյանը՝ Սիթիների դեմ սկսված բոյկոտի մասին

Թավշյա հեղափոխությունից հետո Ֆեյսբուք սոցիալական ցանցում բոյկոտի կոչեր են հնչում, որպեսզի այլեւս գնումներ չարվեն ԱԺ ՀՀԿ-ական պատգամավորներ Սամվել Ալեքսանյանի «Երեւան Սիթի» եւ Արտակ Սարգսյանի «ՍԱՍ» սուպերմարկետներից: ՀԺ-ն Սամվել Ալեքսանյանից հետաքրքրվեց, թե արդյո՞ք զգում է, որ իր սուպերմարկետների ցանցերից գնումներ քիչ են կատարվում: - Պարոն Ալեքսանյան, ֆեյսբուքում որոշ օգտատերեր կոչեր են հնչեցնում, որ պետք է բոյկոտել եւ «Երեւան Սիթիից» գնումներ չկատարել: Տեղյա՞կ եք: - Դուք տեղյա՞կ եք: - Այո, ֆեյսբուքից: - Ես ֆեյսբուք չեմ կարդում, չգիտեմ: - Եվ կա տեղեկություն, որ ձեր սուպերմարկետներում այնքան ժամանակ աշխատավարձ չեք վճարելու, մինչեւ այս սկանդալը չավարտվի: Ճի՞շտ է: - Ո՞վ է ասում: Նման բան չկա: Մի հոգի մարդ կա՞, որ գա, ասի նման բան կա: - Իսկ ի՞նչ եք անելու, որ սուպերմարկետների ցանցն այդ բոյկոտից զերծ մնա: - Ես քեզանից եմ լսում, որ նման բան կա, ես խաբար չեմ: - Այսինքն, վնասո՞վ չեք աշխատում: - Հիմա սաղ բիզնեսն է բան եղած, ոչ միայն սուպերմարկետը: Այս վիճակին սաղ բիզնեսն էլ անկում է ապրում: - Այսինքն, ինչ բոյկոտի շարժումը սկսվեց՝ անկու՞մ է ապրում, զգու՞մ եք: - Այո, զգում ենք, անկում է ապրում: Ես տարբեր բնագավառի մարդկանց հետ եմ խոսում, որ սուպերմարկետի հետ կապ չունեն, բայց էլի ասում են, որ բիզնեսի վիճակը վատ է: Էս շարժը ամեն ինչի վրա ազդել է: