ՀՀԿ-ն ընդդիմություն է «աշխատում». երկար հարց,կարճ պատասխան

Ազգային ժողովում   ընդդիմության առաջնորդ, վարչապետի թեկնածու Նիկոլ Փաշինյանի  և  իշխող Հանրապետական կուսակցության խմբակցության հանդիպմանը ԱԺ արտաքին հարաբերությունների հանձնաժողովի ղեկավար Արմեն Աշոտյանը մեջբերեց Փաշինյանի՝ նախկինում արած հայտարարություններից. «ԵԱՏՄ-ում մնալու միակ հիմնավորումը շանտաժն է», «ԵԱՏՄ-ն ՀՀ-ին բացի վնասից ոչ մի օգուտ չի բերել», «ԵԼՔ-ն իշխանություններին 10/2 հաղթեց՝ ԵԱՏՄ-ից դուրս գալու հարցով», «ԵԱՏՄ անդամակցությունից հետո ՀՀ-ն տարածքներ է կորցրել»: Ի՞նչ փոխվեց այս 6 ամսվա ընթացքում, որ գնահատականները ԵԱՏՄ կործանարար ազդեցությունը տարածքների կորստի վրա այսօր չեն հնչում: Արդյո՞ք մտադիր եք ԵՄ-ի հետ ստորագրված համաձայնագիրը զրոյացնելու ու նոր համաձայնագիր ստորագրելու, հարցրեց Աշոտյանը: «Առաջին հարցին արդեն պատասխանեցի»,- ասաց նա՝ հավանաբար նկատի ունենալով Շարմազանովի հարցերին տված պատասխանը: Նիկոլ Փաշինյանը նշել էր, որ գաղտնի չէ, որ ինքն անձամբ դեմ է քվեարկել Հայաստանի անդամակցությանը ԵԱՏՄ-ին, ինչը նշանակում է, որ ինքը դեմ է եղել այդ գործընթացին: Բայց, այնուամենայնիվ, Հայաստանը ԵԱՏՄ անդամ է եւ լինելով քաղաքական ու պետական գործիչներ պետք է հաշվի նստել իրողությունների եւ փաստերի հետ. «Բայց ես նաեւ ԱԺ-ում դեմ եմ քվեարկել ԵԱՏՄ-ից դուրս գալու նախաձեռնությանն այն պատճառաբանությամբ, որ հատկապես արտաքին քաղաքական բնագավառում կտրուկ շրջադարձները շատ վտանգավոր կարող են լինել երկրի համար»,- ասել էր  Փաշինյանը: