«Այս համակարգի կազմաքանդման միակ մեծ խոչընդոտը մնում է ԱԺ արտահերթ ընտրությունների ժամկետը». Դավիթ Գևորգյան

Կարծես թե ավելի ակնհայտ է դառնում, թե քաղաքական դաշտի հիմնական խաղացողների պահանջները ու մտահոգությունները ինչի հետ են կապված: Առաջին հայացքից կարող է թվալ, թե դա նոր ժամանակավոր կառավարության մեջ տեղ ունենալն է, բայց նրանց համար կա դրանից կարևոր հարց. ԱԺ արտահերթ ընտրությունների ժամկետը: Նիկոլ Փաշինյանը այս մասով ասել է, որ իր կարծիքով այն պետք է հնարավորինս շուտ կազմակերպվի: Բայց նաև նշում է, որ այս հարցը պետք է քննարկել մյուս ուժերի հետ, գալ ընդհանուր հայտարարի, ինչը իհարկե ճիշտ մոտեցում է: Բոլորն էլ հասկանում են, որ որքան արագ տեղի ունենան նոր, արտահերթ ԱԺ ընտրությունները, այնքան գրանցվող արդյունքների վրա մեծ ազդեցություն է ունենալու այս շարժումը: Ակնհայտ է, որ մենք չենք ունենալու այն ԱԺ-ն, որն ունենք հիմա: Տարբեր ուժեր հույս ունեն, որ եթե ընտրությունները տեղի ունենան մեկ տարի հետո, հաղթանակի այս էյֆորիան անցած կլինի ու նրանց շանսերը ավելի մեծ կլինեն ընտրություններում: Այսպես են մտածում հիմնականում պռոռուսական ուժերը: Այսպիսի ցանկություն ունի նաև պաշտոնական Կրեմլը: Ու մի քանի օր առաջ արված հայտարարության այն մասը, որտեղ շեշտվում է վերջին ընտրությունների լեգիտիմ արդյունքներով ձևավորված ԱԺ-ն, հենց դրա մասին է խոսում: Ռուսաստան էլ լավ է հասկանում, որ որքան շուտ լինեն ընտրությունները, այնքան քիչ պռոռուսկան կլինի նոր ԱԺ-ն: Բոլոր այս ուժերին ժամանակ է պետք վերադիրքավորվելու, ուժերը հավաքելու ու նոր իրողություններում պայքարելու համար: Մեծ հաշվով այս համակարգի կազմաքանդման միակ մեծ խոչընդոտը մնում է արտահերթ ԱԺ ընտրությունների ժամկետը: Կարծում եմ, որ այս ուժերը ամեն ինչ անելու են, որ դրանք հնարավորինս ուշ լինեն: Շատ դժվար պայքար է սպասվում: