«Այս պահին ՀՀԿ-ն զբաղված է առևտրով և ժամանակ է շահում». Կարինե Խոդիկյան

Այսօր Հայելի ակումբում լրագրողների հետ հանդիպմանը արձակագիր, դրամատուրգ Կարինե Խոդիկյանը նշեց, որ ճակատամարտում բացարձակ հաղթանակ ենք տարել, բայց պատերազմը շարունակվում է։ «Մենք մայիսի 1-ից հետո ունենք 2 պլան. կամ ՀՀԿ-ն չի ապահովի 6 ձայնը, կամ 2-րդ տարբերակում գուցե և ամբողջ ֆրակցիայով անցկացնեն Նիկոլ Փաշինյանին»։ Սակայն, ըստ Կարինե Խոդիկյանի, Նիկոլ Փաշինյանի ընտրությամբ ամեն ինչ չի ավարտվի: «ՀՀԿ-ականները խոսում են 7%-ի մասին, և չեն ուզում նկատել, որ հրապարակը բազմամարդ է: Նրանք չեն զիջելու, մինչև վերջ գնալու են, փորձելու են ինչ-որ բան պահել: Նրանք չեն ուզում ընդունել որ և՛ ժամանակներն են փոխվել, և՛ մարդիկ, և՛ նրանց համբերությունը: Այս պահին ՀՀԿ-ն զբաղված է առևտրով և ժամանակ է շահում: Նրա միակ ճիշտ քայլն այն կլիներ, որ Սերժ Սարգսյանի հրաժարականից հետո հայտարարեր, որ նա սխավել է, ուստի և մեր գործունեությունը նույնպես սխալ է: Եվ տեսնելով այդ համաժողովրդական շարժումն՝ ինքն իրեն պետք է հայտարարեր ընդդիմադիր և ասեր, որ քաղաքական պայքարը շարունակում է որպես ընդդիմադիր կուսակցություն»,- շարունակեց նա: Բանախոսի խոսքով՝ իշխանափոխությունից հետո պետք է կարողանալ հաղթահարել ամենակարևոր «խութերը». «Քանի որ Ընտրական օրենսգիրքը և Սահմանադրությունը չափված-ձևված է Հանրապետականների հագով, ապա սրանք է պետք լուծել, յուրաքանչյուր սթափ մարդ դրանց վերաբերյալ ունի իր մտահոգությունը»: