Նիկոլին հավատում եմ, նա գիտի՝ չստացվելու դեպքում այս ամենն իր դեմ կշրջվի. Ազատ Աբրահամյան

Երգիչ Ազատ Աբրահամյանը ֆեյսբուքյան իր էջում գրառում է կատարել: «Հայաստանյան քաղաքական գործիչների ու կուսակցությունների հանդեպ միշտ էլ, մեղմ ասած, արժանահավատ չեմ եղել: Անշուշտ, քաղաքականությունն ինքնին՝ շահ է, նպատակ, իշխանություն, բայց ախր մեր ժողովուրդն էլ ինքնատիպ ժողովուրդ է, սիրում է յուրովի գնահատել հայ տղամարդուն վայելն ու անվայելը... Եվ, ահա տարիներ շարունակ, իրենց քաղաքական աճպարարություններով հիասթափեցրած քաղաքական գործիչները ձեւավորեցին մի մթնոլորտ, որտեղ ապրելն ու հավատալն այլեւս անհանդուրժելի էին. արտագաղթի գլխավոր եւ հիմնական դրդապատճառն ահա այս հանդիսացավ: ... Նիկոլին՝ հավատում եմ: Քաղաքականը մի կողմ դրած... Հավատում եմ, որ շտկելու, փոխելու, կառուցելու նպատակներով է առաջնորդվում, որ բոլորիս երազած Հայաստանն է ուզում, գիտակցելով նաեւ, որ հակառակ դեպքում՝ իր դեմ է շրջելու իր իսկ կողմից հիմնադրած ժողովրդական շարժման այս նորովի մտածողությունն ու մոտեցումները, քանզի, հաղթանակի համն զգացած մեր ժողովրդին կանգնեցնելն այլեւս անհնար է լինելու... Հարկավոր է ամեն ինչ անել, որ այս հաղթանակն ամրապնդվի, եւ ես մեկն եմ լինելու՝ հարյուր հազարավորներից. ցանկալի կլիներ՝ միլիոնավորներից...»,- գրել է նա ու հրապարակել #ԻմՔայլը շարժման խորհրդանիշ լուսանկարը: