Չի կարելի պաշտոններ խոստանալ եւ պատգամավորներին «զախոդվել» ու ասել, որ քաղաքական առեւտրով չեք զբաղվում. Աշոտյան
«Սիրո եւ համերաշխության» հասարակությունը չի կարելի փոխակերպել ատելության եւ թշնամանքի» հասարակության: Այդ մասին Facebook-ում գրել է ՀՀԿ փոխնախագահ, ԱԺ պատգամավոր Արմեն Աշոտյանը։ «Չի կարելի այլախոհությունը պիտակավորել որպես ազգային դավաճանություն: Չի կարելի պաշտոններ խոստանալ եւ պատգամավորներին «զախոդվել» ու ասել, որ քաղաքական առեւտրով չեք զբաղվում: Չի կարելի ազդարարել ազատության մասին՝ ու ճնշել մնացածի ազատությունը: Չի կարելի խոսել արդարությունից, երբ գործիքակազմդ սկսում է չտարբերվել հեղափոխական տեռորի գործիքակազմից: Չի կարելի բանակցություններից խոսել, իսկ իրականում կազմակերպել դեբատների ձեւաչափ: Սեւ ցուցակներ, հետո երեւի անցակալիների ցուցակներ, հետո երեւի գնդակահարման ցուցակներ, հետո երեւի սննդամթերքի բաշխման ցուցակներ… Այս ճանապարհը տանում է ոչ թե #ՀՀԿհեռացիր-ին այլ #Պետությունվերացիր-ին: Պետք չէ սեւացնել ոչ Նիկոլին, ոչ էլ Կարապետյանին, ոչ էլ որեւէ մեկին: Դիպլոմը vs Գազպրոմը շատ թույլ փաստարկներ են: Հայաստանին ոչ թե կոմպրոմատների պատերազմ է պետք, այլ հետագա զարգացման ծրագրերի մրցակցություն, ոչ թե հոխորտալ է պետք, այլ լսելու ունակություն ունենալ, ոչ թե զագցմունք է պետք, այլ բանականություն: Մինչեւ մայիսի մեկի ԱԺ հատուկ նիստը դեռ կա «ոսկե պատուհան»: Երբ մտնում ես փակուղի, ապա կես քայլ հետ գնալը նահանջ չէ, այլ թունելի վերջում լույս տեսնելու շանս»,- նշել է նա:
Հետևեք մեզ Viber-ում
